Ema rihun 53 resin iha Timor-Leste simu ona doze dahuluk vasina kontra COVID-19
Komisaun interministeriál ne’ebé responsavel hodi implementa planu vasinasaun nasionál fó sai ohin, loron 21 fulan-maiu tinan 2021, katak totál ema hamutuk na’in 53.000 maka simu ona doze dahuluk vasina nian kontra COVID-19. Husi númeru ne’e, ema na’in 40.800 simu vasina iha Dili, númeru ne’ebé maka korresponde ba porsentu (%) 11 husi populasaun iha kapitál.
Kampaña nasionál vasinasaun nian kontra coronavírus, hahú iha loron 7 fulan-abríl liubá hafoin doze dahuluk rihun 24 husi vasina ne’e, ne’ebé haruka hosi mekanizmu COVAX to’o iha Timor-Leste no ho Primeiru-Ministru, Taur Matan Ruak, hanesan sidadaun dahuluk iha país atu simu doze dahuluk husi vasina ne’e. Tanba frasku sira ne’e sempre iha kuantidade ida ne’ebé liu uitoan, mak ema besik rihun 28.600 maka bele simu vasina iha faze dahuluk nian.
Durante fulan ne’e, iha loron 5 no iha loron 19, Timor-Leste simu tan vasina lote rua ne’ebé haruka husi Austrália, no kampaña daruak vasinasaun nian hahú ona iha loron 10 fulan-maiu.
Ohin, loron 19 fulan-maiu tinan 2021 to’o iha Timor-Leste vasina AstraZeneca rihun 20, ne’ebé oferese husi Austrália. Ida-ne’e pakote daruak husi vasina nian ne’ebé haruka husi Austrália mai Timor-Leste, hafoin pakote dahuluk ho vasina rihun 20 to’o iha loron 5 fulan-maiu.
Iha loron sanulu ikus-ne’e, kada loron, ema besik rihun 2280 maka simu vasina.
Iha loron kuarta-feira, Konsellu Ministrus aprova ona rezolusaun Governu nian ida ne’ebé define hanesan meta atu alkansa, iha kampaña vasinasaun nian, kada loron ema na’in rihun 5 maka simu vasina.
Dadus ikus ne’ebé hato’o horisehik husi Sentru Integradu Jestaun Krize nian, hatudu katak Timor-Leste rejista totál kazu 5121 ne’ebé akumula hahú husi kedas pandemia nian. Husi kazu ativu 2398 ne’ebé daudaun ne’e rejista ona, kazu 1.949 rejista iha munisípiu Dili, kazu 136 iha Baukau, kazu 122 iha Kovalima no kazu 88 iha Vikeke. Taxa insidénsia iha nivel nasionál mak abitante 13,4/100.000 (sanulu resin tolu, vírgula haat, ba abitante rihun atus ida) no iha Dili mak abitante rihun 40,6/100.00 (rihun haatnulu, vírgula neen ba abitante rihun atus ida).
