Autoridade Aduaneira Timor-Leste hala'o lansamentu ba Liña Direta 12200 ne'ebé permite halo relatu anónimu ba atividade suspeita
Ministru Finansas, Rui Gomes no Embaixadór Estadus Unidus Amérika, Kevin Blackstone, horiseik, lansa ona Liña Direta Alfandegáriu (Customs Hotline) ne’ebé sei permite públiku atu relata atividades suspeitu iha kualker oras liuhusi liga ba númeru gratuita 12200 ka relata online iha portál Autoridade Aduaneira, Ministériu Finansas www.customs.gov.tl
Iha nia diskursu, Ministru Rui Gomes hateten “Fasilidade ida-ne’e hanesan dalan ida atu hadi’ak liután servisu atendementu ba kliente-sira husi Autoridade Aduaneira. Ha’u fi’ar katak ho uzu teknolojia avansadu ne’e, funsionáriu sira sei bele halo sira-nia serbisu ho di’ak liután - atende kliente sira ho maneira efisiente no efikaz liután bazeia ba regras no regulamentu – promove transparénsia no akuntabilidade iha administrasaun no koleksaun reseitas. Ezersisiu ida-ne’e monu iha ámbitu Reforma Jestaun Finansas Públiku no Reforma Fiskál ne’ebé hahú ona dezde tinan-2015."
Ministru Rui Gomes mós kongratula lideransa husi Vise-Ministra Finansas, Sara Lobo Brites no apresia koordenasaun di’ak entre Diretór Jerál Autoridade Aduaneira, José Abilio ho nia ekipa no apoiu husi USAID. “Rezultadu husi Ita-Boot sira nia kolaborasun di’ak mak melloramentu iha nível servisu Ita-nia alfándega,” Ministru konklui.
Eventu lansamentu ne’e hetan partisipasaun husi Eis Prezidente no Laureadu Nobel da Paz, Sua Exelénsia Dr. José Ramos-Horta, Ministru Turizmu, Komérsiu no Indústria, José Lucas do Carmo da Silva, Ministru Agrikultura no Peskas, Pedro dos Reis no Vise-Ministru Saúde, Bonífacio Maucoli dos Reis inklui mós reprezentante-sira husi liña ministériu relevante ne’ebé durante ne’e servisu hamutuk ho USAID hodi implementa atividades iha Timor-Leste.
