Governu Timor-Leste

Ohin, loron 11 fulan-maiu 2021, Ministru ba Asuntus Parlamentares no Komunikasaun Sosiál – MAPCOMS (sigla portugés), Exelénsia Francisco Martins da Costa Pereira Jerónimo fó pose ba Prezidente Konsellu Administrativu Rádio no Televizaun Timor-Leste, Empreza Públika – RTTL,E.P., José António Belo “Taraleu” iha Auditóriu Prezidénsia Konsellu Ministrus – Palácio do Governo ba períudu tinan 2021 to’o 2025.

Ezekutivu MAPCOMS ne’e hato’o parabéns ba Prezidente foun no hein katak bele halo servisu ho di’ak no bele realiza iha tempu badak nia laran. Governante ne’e haktuir mós katak, “parte Governu sei kria kondisaun hotu atu RTTL sai empresa públika ida ne’ebé bele hamriik mesak no sei la hein deit doasaun no transferénsia públiku husi governu.”

Responsavél másimu MAPCOMS mós husu atu RTTL,E.P prinsipál liu maka haree ba iha Dekretu Lei númeru 42/2008 artigo 4,5,7 atu nune’e bele dezenvolve RTTL sai empresa públika ida.

Iha diskursu Prezidente atuál katak, “sei hatutan obra sira ne’ebé mak kolega sira halo ona no presija servisu hamutuk hodi hadi’a di’ak liu tan RTTL.E.P. ne’e hodi sai empreza estatál ida ne’ebé mak forte no hala’o duni nia funsaun no sai hanesan roman lolos ba nasaun ida ne’e, tuir lema ka motto RTTL nian katak, promove dezenvolvimentu, harmónia sosiál no unidade nasionál.”

Partisipa iha serimónia ne’e Premiado Nobel da Paz, Doutór José Ramos Horta, Padre Albino Gonçalves, Veteranus Custódio Belo “Alin Laek” , Domingos da Câmara “Amico” no Helder Freitas “Camarudin”, Prezidente Konsellu Emprensa Virgílio Guterres, no dirijenti sira husi mídia estatál no mídia privadu.