Loron Mundiál ba Servisu nain
Atu hasoru Loron Mundiál ba Servisu nain (Dia Mundial do Trabalhador) ne’ebé monu iha loron 1 fulan Maio 2010 Asosiasaun Amizade Timor-Leste Cuba (AATLC) hamutuk ho Sekretária Estadu ba Formasaun Profissionál no Empregu (SEFOPE) no Ministériu Saúde (MS) hakarak fó hanoin ba povu tomak ba saida maka alkansa ona no mós fó motivasaun, liu husi aktividade rua (2) hanesan hanoin lesuk iha TVTL no kolókiu Loron Mundiál ba Serbisu nain iha Delta Nova, 30 Abril 2010, ho tópiku “Etos Serbisu hodi Proteje Saúde iha Timor-Leste”.
Maske Governu Timor-Leste hasoru dezafius oin-oin iha prosesu rekonstrusaun ba dezenvolvimentu nasionál, maibé iha sektór balun komesa hatudu ninia qualidade servisu nebé a’as no diak, liu-liu sektór prioridades hanesan saúde, edukasaun, agrikultura, infraestrutura no seluk tan. Areas hirak ne’e, governu hamutuk ho organizasaun parseiros dezenvolvimentu, sosiedade sivil no mós ho povo tomak, iha vontade maka’as atu hadia hamutuk no hadia diak liu maske ho kapasidade nato’on.
Programas hirak nee sei elabora no hetan kolaborasaun hamutuk husi instituisoens tolu ne’e. Inisiativa ne’e foti husi AATLC no servisu hamutuk ho SEFOPE tamba assuntos trabalhadores kabe iha SEFOPE ninian papél no kestiona tópiku iha kolókiu ‘Etos Serbisu hodi Proteje Saúde ba Serbisu Nain iha Timor-Leste tanba ne’e involve mós Ministériu Saúde.
Objetivu husi tópiku ne’e atu fó hanoin ba serbisu nain tomak atu bele reduz risku nebé serbisu nain hetan iha kampu serbisu. Ne’ebe ho razaun katak serbisu nain hotu-hotu iha direitu no asesu hanesan atu hetan isin diak iha kampu serbisu.
Hare’e ejijensia no nesesidade iha Timor-Leste, Governu fiar katak Selebrasaun Loron Mundial ba Servisu nain iha tinan 2010, atu hadia konsiénsia kona-ba Etos Serbisu hodi Proteje Saúde Iha Timor-Leste.
