Governu Timor-Leste

Serimónia lansamentu ró pasajeiru nasionál daruak, Berlin-Ramelau, hala’o ona iha loron 10 fulan-maiu tinan 2021. Marka prezensa iha serimónia ne’e, Embaixadór Timor-Leste nian iha Xina, Abrão dos Santos, no Embaixadór Alemaña nian iha Xina.

Projetu konstrusaun ró pasajeiru nasionál daruak ne’e finansia hamutuk husi Governu Timor-Leste no Governu Repúblika Federál Alemaña nian.

Berlin-Ramelau konstroi hela iha Xina, husi empreza armadora husi Olanda ho naran Damen Shipyards ho nia luan metru 16, kaladu metru 3,3, naruk metru 67,3, konvés ho aas metru 4,8 no sei atinje velosidade másima nós 10 to’o 12. Ró foun ne’e sei troka Nakroma no iha kapasidade ida atu tula ema 380 resin.

Konstrusaun Berlin-Ramelau atinje ona 85%, no prevee katak teste finál sira no aprovasaun téknika sei hala’o iha fulan-jullu oin mai, iha Shangai no ninia entrega sei hala’o iha fulan-setembru.