Governu Timor-Leste

Parlamentu Nasionál (PN) liu husi komisaun C ba asuntu Ekonomia, Finansa no Anti- korupsaun organiza konferénsia Internásionál durante loron rua, kona-ba Impaktu Korupsaun ba Dezenvolvimentu Nasionál iha salaun Ministériu Negósiu Estranjeiru, Dili , loron 21 no 22 fulan Abril ho apoiu husi USAID no Asia Fundation.

Prezidente Komisaun C ba Asuntu Ekonomia, Finansa no Anti-Korupsaun, Manuel Tilman iha nia entrevista iha Portál Governu nian, hateten katak korupsaun hanesan obstáklu boot ida ba dezenvolvimentu, mak hanesan ba Dezenvolvimentu Humanu, Ekonomiku no Finanseiru. Bainhira iha ona korupsaun, osan ne’ebé tama ba estadu halai dei’t ba ema balun nia liman no ida ne’e hanesan mentalidade aat hodi sobu fali estrutura nasaun nian.

Nia mós informa tan katak objetivu husi konferénsia ida ne’e atu haree ba setór rua ne’ebé fundamentál mak prenvensaun no investigasaun. Bainhira Konferénsia ne’e remata, Parlamentu Nasionál sei deskuti nafatin fasilidade ida atu harii rede anti- korupsaun ne’ebé sei involve deputadu, universitáriu, estudante, no relijiozu sira hodi fó liman ba malu atu hamutuk kombate korupsaun. Konferénsia ne’e hanesan planu anuál ida husi aktividade Komisaun Ekonomia no Finansa no Anti-Korupsaun nian no hanesan mós inisiativa husi Parlamentu nian ho apoiu husi USAID no Asia Fundation.

Partisipa iha konferénsia ne’e mak Prokuradora- Jerál, Prezidente Tribunal Rekursu, Provedór ba Direitu Umanu no justisa, Dr. Marí Alkatiri, partidu Polítiku sira, membru governu balun, Korpu Diplomátiku no Sosiedade Civil. Ho oradór sira mak hanesan Sekretariu Jerál GOPAC John G. William, reprezentante Membru komitéP III Indonézia, Eva Kusuma Sundari, asesór Parlamentu Nasionál Prof. Dr. Yohanes Usfunan, Drs. SH, M. H no Representante ACC Singapura, Dr. Teng Khee Fatt.