Governu Timor-Leste

Ministru Edukasaun, Juventude no Desportu, Armindo Maia, asina Memorandu Entendimentu ida ho Diretora Nasionál husi Ajénsia Kooperasaun Internasionál Koreia nian (KOIKA) iha Timor-Leste, Eunju Cha, ba projetu kooperasaun nian ida ba dezenvolvimentu desportu ba labarik no foin-sa’e sira iha Timor-Leste. Serimónia asinatura akordu ne’e nian hala’o iha instalasaun Ministériu Edukasaun, Juventude no Desportu nian, iha Dili, iha loron 4 fulan-maiu tinan 2021.

Projetu ne’e ninia objetivu mak atu promove labarik no foin-sa’e sira-nia partisipasaun iha atividade desportiva, liuliu iha futeból no sensibiliza públiku einjerál ba dezenvolvimentu infantíl liuhusi atividade desportiva. Intensaun seluk maka atu estabelese, liuhusi programa ida-ne’e, sistema desportivu iha Timor-Leste, liuhusi reforsu kapasidade jestaun organizasionál no treinadór desportivu juveníl sira nian no liuhusi modernizasaun ba instalasaun desportiva juveníl sira.

Bazeia ba memorandu ne’e, sei harii sentru futeból juveníl ida iha Bekora no sei realibilita kampu komunitáriu tolu iha sidade Dili, iha Bidau, Kampung Alor no Komoro. Projetu kooperasaun nian ida-ne’e ninia montante totál maka dolar amerikanu millaun 6,5 ne’ebé sei finansia husi KOIKA.

Aleinde harii sentru juveníl no reabilitasaun kampu komunitáriu sira, iha ámbitu projetu ida-ne’e nian, sei fornese mós ekipamentu ba instalasaun desportiva sira. Ajénsia Koreia nian ne’e mós sei apoia formasaun ba treinadór futeból juveníl nian sira no haruka espesialista sira hodi tulun atu kria liga anuál futebol juveníl ida ba foin-sa’e sira ho idade tinan 11 to’o 16.

Iha ninia diskursu iha serimónia asinatura ne’e nian, Ministru Edukasaun, Juventude no Desportu agradese ba Governu no povu koreanu ba apoiu ne’e no reitera kompromisu Governu Konstitusionál VIII nian ba dezenvolvimentu desportu nian, liuliu dezenvolvimentu futeból nian iha Timor-Leste.