Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães no Embaixadór foun Brazíl nian iha Timor-Leste, Maurício Medeiros de Assis, hala’o sorumutuk ba dahuluk, iha loron 27 fulan-abríl tinan 2021, iha Palásiu Governu, dezde embaixadór foun ne’e entrega ninia karta kredensiál sira ba Prezidente Repúblika, iha loron 19 fulan-marsu liubá.

Durante sorumutuk ne’e, Ministru no Embaixadór ko’alia kona-ba kooperasaun entre país rua ne’e, situasaun polítika no ekonómika país nian, prioridade Governu nian sira no situasaun pandemia COVID-19 nian.

Embaixadór Brazíl nian ne’e felisita Ministru no Governu Timor-Leste ba susesu iha resposta ba COVID-19, tantu iha nivel saúde, nune’e mós iha jestaun kona-ba impaktu sosioekonómiku husi pandemia ne’e.

Diplomata ne’e halo análize ida kona-ba projetu sira husi kooperasaun Brazíl nian, iha tinan ruanulu ikus ne’e nia laran, iha Timor-Leste, liuliu iha área sira hanesan edukasaun, justisa no militár. Diplomata ne’e fó-sai ona mós katak Brazíl sei fó dolar rihun 120 ba Timor-Leste hodi apoia Governu iha resposta ba impaktu husi inundasaun sira iha loron 4 fulan-abríl liubá, ne’ebé provoka husi Siklone Tropikál Seroja.

Ministru Fidelis Magalhães hato’o bemvindu ba  Maurício Medeiros de Assis no rekoñese esperiénsia barak ne’ebé Brazíl hetan iha área ekonomia komunitária no agrikultura nian, koñesimentu ida ne’ebé sei sai importante ba Timor-Leste no kontribui ba objetivu Governu nian atu diversifika ekonomia no hadi’a seguransa ai-han no nutrisaun nian.