Governu Timor-Leste

Ministériu Finansas (MF) liuhusi Sekretariadu Tékniku Fundu COVID-19, to’o loron Segunda-feira, 19 abril 2021, halo ona pagamentu Cesta Básica ba kompaña lokál 94 ho montante totál US$ 25.079.090

Husi pagamentu 94 ne'e, 50 mai husi Ministériu Turizmu, Komérsiu no Indústria (MTCI). Pedidu pagamentu 24 husi Sekretária Estadu Kooperativa (SeKoop) no pedidu pagamentu 20 mai husi Sentru Lojístiku Nasionál (CLN, sigla Portugés).

Sekretariadu Tékniku Fundu COVID-19, to’o ohin loron seidauk simu pedidu pagamentu husi Ministériu Agrikultura no Peskas, no sei kontinua serbisu hamutuk ho Ministériu Implementadór sira atu aselera pagamentu ba kompaña ne’ebé mak fornese ona ai-han ba programa Cesta Básica.

Bainhira dokumentus pedidu pagamentu kompletu, loos no prienxe ona rekezitus pagamentu tuir Lei haruka, Sekretariadu Tékniku Fundu COVID-19 sei prosesa no realiza pagamentu tuir regras ne’ebé vigora.

Maibé, molok Sekretariadu Tékniku Fundu COVID-19 realiza pagamentu, kompaña sira hotu tenke kumpre sira nia dever hodi ba selu sira nia impostu rendimentu (income tax) 0,5% husi sira nia totál rendimentu konforme Lei Tributária haruka. Kompaña sira tenke aprezenta sira nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.