Ministru Prezdénsia Konsellu Ministrus hala’o sorumutuk ho Embaixadór Austrália nian iha ámbitu resposta ba impaktu sira husi Siklone Tropikál Seroja
Ministru Prezidénsia Konsellu Ministrus, Fidelis Manuel Leite Magalhães, hala’o sorumutk, ohin, loron 21 fulan-abríl tinan 2021, ho Embaixadór Austrália nian iha Timor-Leste, Peter Roberts, iha Palásiu Governu, iha Dili.
Ministru Fidelis Magalhães agradese ba tulun Austrália nian ba Timor-Leste, iha kombate hasoru COVID-19 no resposta ba inundasaun sira no hateten katak daudaun ne’e país hasoru hela dezafiu boot rua, liga ho COVID-19 no ho dezastre naturál sira, iha ne’ebé Governu fahe ninia asaun entre intervensaun emerjénsia nian, rekuperasaun ba estragu sira no resposta ba impaktu sosioekonómiku sira.
Durante sorumutuk ne’e, Ministru no Embaixadór Austrália nian ko’alia ona kona-ba pakote apoiu nian husi Governu Australianu, ho valór dolar australianu millaun 7, atu fó resposta ba inundasaun sira, ne’ebé akontese iha loron 4 fulan-abril liubá, ne’ebé provoka husi Siklone Tropikál Seroja.
Bazeia ba pakote asisténsia umanitária nian ida-ne’e, to’o ona iha país, apoiu emerjénsia nian tonelada balun no ekipa asisténsia médika australiana nian ida, ne’ebé, aleinde ajuda iha resposta emerjénsia nian, sei serbisu mós ho ekipa Ministériu Saúde nian iha ámbitu kombate hasoru COVID-19.
Ukun-na’in ho Diplomata ne’e ko’alia mós kona-ba kompromisu Austrália nian atu haruka doze vasina AstraZenca nian ne’ebé fabrika iha Austrália ho Timor-Leste ne’e sei kontribui ba esforsu Governu nian atu vasina populasaun hotu-hotu to’o tinan ida-ne’e nia rohan.
Embaixadór Austrália nian ne’e hateten dala ida tan disponibilidade atu fó tulun, la’ós de’it iha faze emerjénsia nian, maibé mós iha rekuperasaun no rekonstrusaun nian, iha ne’ebé sei bele fornese mós apoiu sira liuhusi programa sira ne’ebé iha tiha ona no konta ho apoiu husi Austrália, hanesan PNDS no Roads for DevelopmentProgram (R4D) nian.
