Governu Timor-Leste

Membru Governu Konstitusionál VIII nian sira hala’o sorumutuk iha loron 15 fulan-abríl tinan 2021, iha Auditóriu Ministériu Finansas nian, hodi ko’alia kona-ba resposta ba inundasaun iha loron 4 fulan-abríl liubá, ne’ebé provoka husi pasajen Siklone Tropikál Seroja iha territóriu Nasionál.

Primeiru-Ministru, Taur Matan Ruak, iha abertura husi sorumutuk ne’e nian, agradese ba esforsu no empeñu ema hotu nian iha resposta ba dezastre naturál sira-ne’e no hateten katak sorumutuk ne’e ninia objetivu prinsipál mak atu identifika problema sira no nesesidade ne’ebé iha no buka solusaun, iha nivel apoiu emerjénsia nian, reabilitasaun no rekonstrusaun infraestrutura no mós mitigasaun impaktu sosiuekonómiku sira.

Iha sorumutuk ne’e, sira ko’alia mós kona-ba solusaun atu hamenus risku husi dezastre naturál sira no hasa’e reziliénsia nasionál hasoru impaktu husi dezastre naturál sira.

Ministru Administrasaun Estatál, Miguel Pereira de Carvalho, no Sekretáriu Estadu Protesaun Sivíl, Joaquim José Gusmão dos Reis Martins, aprezenta ba membru Governu sira kona-ba pontu situasaun husi impaktu inundasaun no medida apoiu nian ne’ebé implementa ona ka medida sira ne’ebé daudaun ne’e implementa hela.

Tuir dadus provizóriu ne’ebé aprezenta ona, inundasaun ne’e hamate ema na’in 36, na’in sia lakon no família rihun 25 resin iha nasaun laran mak afetadu. Uma hela-fatin 4500 resin maka hetan estragus ka aat.

Sekretaria Estadu Protesaun Sivíl distribui ona apoiu iha Dili ba família 1396 no prevee katak to’o loron 18 fulan-abríl distribuisaun apoiu emerjénsia nian iha Dili ba famíli vítima hotu-hotu bele remata ona. Apoio ba Rejiaun Administrativa Espesiál Oekusi Ambenu (RAEOA), Likisá, Manatutu, Vikeke, Ermera no Aileu mós haruka daudaun ona.

Kona-ba infraestrutura públika sira, pasajen Siklone Tropikál Seroja sobu estrada 22 no ponte 11. Tuir dadus provizóriu husi Ministériu Obras Públikas, estragu iha infraestrutura públika sa’e ba dolar amerikanu millaun 225.