Governu Timor-Leste

Ministériu Finansas (MF) liuhusi Sekretariadu Tékniku Fundu COVID-19, to’o iha loron Segunda-feira, 12 abril 2021, realiza ona pagamentu Cesta Básica ba kompaña lokál hamutuk ualu-nulu-resin-hitu (87) ho montante totál US$ 22.354.643 (númeru kompaña no montante osan hirak ne’e inklui ona ho pagamentu ba kompaña 25 ne’ebé mak MF halo ona pagamentu iha fulan kotuk).

Pagamentu hirak ne’e halo hafoin MF simu pedidu pagamentu husi Ministériu Turizmu, Komérsiu no Indústria (MTCI) hamutuk 50 no MF realiza hotu ona pagamentu hamutuk 50 ne’e ho montante totál US$ 10.635.966

MF mos simu pedidu pagamentu husi Sekretaria Estadu Kooperativa (SeKoop) hamutuk 24. Husi númeru ne’e, pedidu pagamentu 21 mak MF realiza ona ho montante totál US$ 10.218.612 Pedidu pagamentu 3 haruka fila-fali ba SeKoop atu kompleta rekezitus pagamentu tuir Lei haruka, molok MF halo pagamentu.

Aleinde ne’e, MF mós simu ona pedidu pagamentu husi Sentru Lojístiku Nasionál (CLN, sigla Portugés) hamutuk 20. Husi númeru ne’e, MF halo ona pagamentu 16 ho montante totál US$ 1.500.065 Pedidu pagamentu 4 tenke haruka fila-fali ba CLN atu kompleta rekezitus pagamentu tuir Lei haruka, molok MF halo pagamentu.

Ministériu Finansas liuhusi Sekretariadu Tékniku Fundu COVID-19, to’o ohin loron seidauk simu pedidu pagamentu husi Ministériu Agrikultura no Peskas. Sekretariadu Tékniku Fundu COVID-19, kontinua serbisu hamutuk ho Ministériu Implementadór programa Cesta Básica atu aselera prosesu pagamentu ba kompaña sira ne’ebé mak fornese ona ai-han ba programa Cesta Básica.

Bainhira dokumentus pedidu pagamentu kompletu, loos no prienxe ona rekezitus pagamentu tuir Lei haruka, Sekretariadu Tékniku Fundu COVID-19 sei prosesa no sei realiza pagamentu tuir regras ne’ebé vigora.

Maibé, molok Sekretariadu Tékniku Fundu COVID-19 realiza pagamentu, kompaña sira hotu tenke kumpre sira nia dever hodi ba selu sira nia impostu rendimentu (income tax) 0,5% husi sira nia totál rendimentu konforme Lei Tributária haruka. Kompaña sira tenke aprezenta sira nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.

Karik kompaña fornesedór-sira iha pergunta ruma ka presiza informasaun liután kona-ba asuntu impostu, bele dirije kontaktu Autoridade Tributária (AT) ka vizita portál AT www.attl.gov.tl relasiona ho (i) pagamentu impostu, (ii) submisaun relatóriu mensál/anuál no (iii) pedidu emisaun ba Certidao de Dividas. Pagamentu imposto mós bele halo liuhusi mákina ATM P24 no kontribuinte sira la-presiza ba forma tan iha banku komersiál sira hanesan uluk.