CVTL akolla inan ho bebe sira ne’ebé afetadu husi dezastre naturál
Cruz Vermelha Timor-Leste ba dadaun ne’e akolla ema hamutuk 80 resin ne’ebé maioria labarik, inan no bebe sira ne’ebé afetada husi dezastre naturál ne’ebé akontese iha fin-de-semana kotuk.
Prezidente Cruz Vermelha Timor-Leste hateten CVTL iha voluntáriu sira ne’ebé prontu prepara hahan ne’ebé rotina ba bebe, labarik no inan sira ne’ebé refujia iha fatin ne’e.
Madalena Hanjam afirma intervensaun CVTL nian hodi hatan ba situasaun emerjénsia ne’e maka kontinua halo evakuasaun ba vítima sira ba iha fatin seguru hodi salva sira nia vida no oferese ai-han inklui apoiu seluktán.
Madalena Hanjam hateten CVTL mós kontinua mobiliza fundu husi rai-laran no rai-liur hodi fó apoiu ba vítima sira iha Dili no mós iha munisípiu sira seluk ne’ebé afetada ba dezastre naturál hodi bele hadia sira nia kualidade moris.
To’o oras ne’e, CVTL simu ona apoiu tantu materiál no osan husi membru Governu balun, sidadaun privadu no nasaun sira seluk.
Prezidente CVTL realsa ekipa CVTL nafatin halo monitorizasaun ba iha fatin akollimentu sira hodi haree kondisaun sanitária sufisiente ka nesesária duni ka la’e ba vítima sira.
Tuir Madalena Hanjam, família sira ne’ebé afetada husi inudasaun no rai halai maioria sira ne’ebé hela iha fatin sira ne’ebé risku ba dezastre naturál hanesan iha foho lolon no mota ninin ne’ebé proibidu atu harii uma iha fatin hirak ne’e.
Nia parte husu ba Governu liuliu ministériu relevante atu kontinua sensibiliza komunidade sira hodi labele halo uma iha fatin sira ne’ebé risku ba dezastre naturál no implementa planu urbanizasaun nune’e bele define númeru rezidente sira iha kapitál Dili.
Fó hanoin hikas fali katak, mau tenpu ne’ebé rejista iha fin-de-semana kotuk hamate ona ema 42 no kauza danifikasaun ba iha komunidade sira nia uma, empreza sira, eskola, edifísiu públiku sira no infraestrutura sira hanesan estrada, ponte no seluktán.
