Númeru vítima mortál husi dezastre naturál aumenta ba 42
Tuir dadus ne’ebé atualiza husi Sekretaria Estadu Protesaun Sivil, to’o loron 07 fulan-abril tinan 2021, númeru ema ne’ebé mate tanba dezastre naturál ne’ebé akontese iha fin-de-semana kotuk iha teritóriu nasionál sae ba 42. Husi totál númeru, ema na’in-15 maka to’o agora sira nia isin-mate seidauk hetan.
Dadus SEPS konfirma katak iha Dili rejista ema mate hamutuk 22, iha Ainaro ema na’in-10, iha Aileu na’in-2, iha Manatuto na’in-5 no iha Viqueque ema na’in-3 no maioria mate tanba inundasaun no rai halai.
Relativamente iha munisípiu Dili, dadus atualizadu hatudu katak, postu administrativu Cristo-Rei rejista ema mate na’in haat, postu administrativu Vera-Cruz rejista ema mate na’in ida no postu administrativu Dom Aleixo rejista númeru vítima mortál ne’ebé aas hamutuk ema na’in-17, iha ne’ebé na’in hitu iha Manleuana-Beduku, lima iha Moris Foun, haat iha 30 de Agosto no ida iha Malinamuk.
Enkuantu relasiona ho dadus desalojadu, protesaun sivil rejista família uma kain hamutuk rihun rua resin no ema kuaze rihun sanulu mak dadaun ne’e hela iha fatin akollimentu temporáriu hamutuk 18 iha kapitál Dili.
Kona-ba refeisaun no apoiu sira seluk ba vítima sira iha sentru evakuasaun hetan tulun husi instituisaun Estadu sira, organizasaun internasionál, emprezáriu sira no sidadaun individuál.
Iha sentru evakuasaun haat mak prepara rasik refeisaun ba vítima sira hanesan Sentru Formasaun Dom Bosco-Comoro, Madre Saleziana Comoro, Madre Saleziana Balide no Ospitál Militár Lahane Osidentál.
Dadaun ne’e, Sekretaria Estadu Protesaun Sivil servisu hamutuk ho Institutu Jestaun no Ekipamentu no Unidade Polísia Marítima kontinua buka tuir ema sira ne’ebé lakon.
Udan boot ne’ebé akontese iha fin-de-semana ne’e afeta populasaun iha munisípiu sira ne’ebé afetadu no kauza mós estragus ba iha komunidade sira nia uma, edifísiu públiku sira, estrada, ponte no infraestrura seluktán.
