Governu Timor-Leste

Konsellu Ministru hala’o sorumutuk iha Palásiu Governu,  iha Dili no, haree ba impaktu ne’ebé provoka husi inundasaun iha loron 4 fulan-abril liubá no hodi permite populasaun bele enfrenta estragu sira ne’ebé provoka husi bee-sa’e (banjir), ne’ebé estraga ka destroi uma barak, Konsellu Ministru aprova projetu Rezolusaun Governu nian ne’ebé suspende impozisaun konfinamentu domisiliáriu jerál ba populasaun iha munisípiu Dili, to’o Governu deside fila-fali.

Aprova mós ona projetu Rezolusaun Governu nian ne’ebé mantein impozisaun serka sanitária iha Munisípiu Baukau no Vikeke ba loron hitu (7) tan. Nune’e, sei kontinua bandu sirkulasaun ema nian entre munisípiu sira ne’e no munisípiu sira-seluk, exetu iha kazu sira ne’ebé ho fundamentu forte tanba razaun sira hanesan seguransa públika, saúde públika, asisténsia umanitária, manutensaun husi sistema sira ba abastesimentu públiku ka ba realizasaun interese públiku nian. Governu deside la halo renovasaun ba impozisaun konfinamentu domisiliáriu jerál ba populasaun iha Baukau no Vikeke.

Sekretáriu Estadu Protesaun Sivil, Joaquim José Gusmão dos Reis Martins, halo aprezentasaun ida ba Konsellu Ministru kona-ba pontu situasaun husi impaktu inundasaun iha loron 4 fulan-abril tinan 2021, ne’ebé provoka husi siklone tropikál Seroja. Tuir dadus hirak ne’ebé aprezenta ona iha sorumutuk, inundasaun provoka besik ema rihun sanulu maka lakon uma  iha Dili, ne’ebé daudaun ne’e alojadu iha sentru akollimentu ne’ebé espalla iha sidade. Bee-sa’e ne’e provoka ema 42 maka mate, 22 husi Dili, sanulu iha Ainaro, lima iha Manatutu, na’in tolu iha Vikeke no na’in rua iha Aileu.

Konsellu Ministru aprova ona projetu Rezolusaun Governu ba deklarasaun estadu kalamidade, ba períodu loron 30, hodi hasoru akontesimentu bee-sa’e no inundasaun iha Munusípiu Dili, iha dadersan-nakukun loron 4 fulan-abril tinan 2021, ne’ebé provoka husi siklone tropikál Seroja.

Kria ona grupu serbisu tékniku ne’ebé sei responsavel ba identifikasaun infraestrutura no ekipamentu públiku koletivu ne’ebé mak hetan estraga husi inundasaun no hodi prepara proposta sira ba nia rekonstrusaun ka reabilitasaun.

Bandu atu harii uma iha área inundasaun no área ho foho lolon ne’ebé naton to’o aas tanba perigu tebes.  Asaun ka forma utlizasaun rai ne’ebé bele aumenta risku akontesimentu fila-fali ka agrava ninia impaktu sira.

Konsellu Ministrus deside atu aprova mobilizasaun apoiu internasionál hodi hatán ba impaktu sira inundasaun nian iha loron 4 fulan-abril tinan 2021 liubá.