Governu no Parlamentu Nasional Deskute Alterasaun Lei Migrasaun no Azilu
Guvernu liu husi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno no Vise-Ministru Interior akompaña mos husi Diretor Jeral Migrasaun, Superintendente Polisia Luis Soares Baretto no-mos asesor juridiku sira halo audensia publika ho deputadu sira husi Komisaun B Parlamentu Nasional (PN) ne’ebe trata asuntu Negósiu Estranjeiru, Defeza no Seguransa Nasional, hodi deskute projetu lei Numeru.25/V/ (3a) hodi halo primeira alterasaun lei no. 11/V/2017, Lei Migrasaun no Azilu kona-ba Lei Migrasaun no Azilu.
Prezidente Komisaun B, Jose Agustino Sequeira ” Somotxo” esplika, alterasaun ida ne’e komisaun B maka inisiativa hodi fo dalan ba misionariu sira halo sira nia misaun bazeia ba konkordata ne’ebe estadu Timor-Leste asina ho Vatikanu.
“Ohin ita halo audensia publiku ho Ministeriu Negosiu Estranjeiru no Koperasaun no Ministeriu Interior, iha ne’ebe inisiativa hosi Parlamentu Nasional ne’ebe halo rezulusaun ida para autoriza komisaun B hodi halo alterasaun ba Lei Migrasaun no Azilu ne’ebe asina husi proponente komisaun B ho deputadu sanulu resin hakarak halo alterasaun ba projetu Lei Migrasaun no Azilu liu-liu artigu 59 para atu klarifika di’ak liu tan konkordansia ho movimentu misionariu sira atu bele hela iha Timor-Leste bazeia ba konkordata ne’ebe estadu Timor-Leste asina ho Vatikanu,” esplika Somotxo hafoin remata audensia ne’e iha Rezidensia Prezidente Parlamentu Nasional Farol, kinta ne’e.
Nia hatutan, ho primeira alterasaun ne’e nia rekomenda ba Guvernu atu hare didiak liafuan balun ne’ebe labele fo presedensia ba konvisoens relijioju seluk bele husu tan sira nian direitu atu bele hela iha ne’e hanesan ba misionariu sira husi relijiaun seluk ne’ebe eziste iha Timor-Leste.
“Altersaun ne’e sei debate fali iha faze espesialidade hamutuk hodi rona opiniaun no sujestaun depois komisaun B sei halo ninian relatoriu pareser ho hadia artigu 59 no hosi parte Ministeriu Interior nian hanesan apoia komisaun B maka artigu 13, 41 no 127 ida ne’e sei hadia hotu mak foin akompaina ho relatoriu pareser komisaun B nian ba Parlamentu Nasional,” tenik Somotxo.
