Governu Timor-Leste

Ohin, loron 5 fulan-abríl tinan 2021, doze rihun 24 dahuluk vasina AstraZaneca kontra COVID-19 to’o iha Timor-Leste, tuir Mekanizmu COVAX nian. Vasina ne’e transporta mai ho tulun husi UNICEF.

Serimónia kona-ba vasina to’o-mai iha Aeroportu Internasionál Nicolau Lobato konta ho partisipasaun husi Ministra Saúde, Odete Maria Freitas Belo, Vise-Ministru Saúde, Bonifácio Mau Coli dos Reis, Ministra Negósius Estranjeirus no Kooperasaun, Adaljiza Magno, reprezentante UNICEF nian iha Timor-Leste, Bilal Aurang Zen Durrani no mós reprezentante husi Organizasaun Mundiál Saúde nian iha Timor-Leste, Arvind Mathur. Parseiru dezenvolvimentu nian sira seluk no membru korpu diplomátiku sira seluk mós partisipa iha serimónia ne’e.

Ministra Saúde, iha ninia intervensaun durante serimónia ne’e, agradese ba “esforsu koletivu ne’ebé parseiru sira-hotu, liuliu OMS no UNICEF, halo ona to’o oras ne’e atu vasina sira-ne’e bele to’o iha Timor-Leste, ne’ebé sei permite ita-nia populasaun atu hetan vasina kontra COVID-19”.

Serimónia ne’e hotu tiha, vasina sira-ne’e tula lori ba armazén sentral Servisu Autónomu Medikamentu no Ekipamentu Saúde (SAMES) nian.

Lansamentu kampaña vasinasaun nian sei hala’o iha loron 7 fulan-abríl mai ne’e, Loron Mundiál Saúde nian, iha Dili no tuirmai vasina ne’e sei sona uluk ba pesoál liña frente nian sira no ba ferik-katuas sira ne’ebé iha nanis ona moras seluk.