Governu Timor-Leste

Autoridade Nasionál Petróleu (ANP), iha semana kotuk, halo aprovasaun ba Planu Dezenvolvimentu Eni nian, empreza produtora boot ida husi Europa, no ninia parseiru sira iha Joint Venture ida ne’e atu esplora Kampu Mina-rai Kitan nian.

Kampu Mina-rai Kitan situa iha distánsia km 250 iha parte sul Timor nian no km 500 husi parte norte Darwin nian, iha Área Konjunta Dezenvolvimentu Petrolíferu.

Nu’udar parte interesada, Governu Timor-Leste sente haksolok ho projetu ne’e, ne’ebé tuir previzaun sei funsiona iha tinan 2011 nia rohan no Kampu Mina-rai ne’e iha mina ne’ebé bele rekupera fali besik barríl tokon 34,5.

Sekretáriu Estadu Rekursu Naturál, Alfredu Pires, hahii “Abordajen ne’ebé proativa no kooperativa duni husi Eni, no ninia parseiru sira iha joint venture, iha sentidu atu servisu tuir povu Timor-Leste nia aspirasaun.”

Eni afirma katak, nia iha interese atu aumenta Timor-Leste nia partisipasaun ekonómika iha Projetu Kitan nian, hodi uza produtu, servisu no servisu-na’in timor-oan” no katak “ sei kontinua servisu ho Governu Timor-Leste iha inisiativa sosiál no ekonómika lubun ida ne’ebé haree liu ba kreximentu ekonómiku país nian.”

Alfredo Pires dehan mós katak “aprovasaun ba planu ne’e sai hanesan fatuk-hakat seluk ida ba dezenvolvimentu onshore ba indústria mina-rai nian iha Timor-Leste” no reforsa katak “empeñu Sekretaria Estadu nian iha projetu ne’e, ba oin, sei fó serbisu barak mai timor-oan hanesan mós ba aumentu produtu no servisu. Planu infra-setrutura ba parte tasi mane nian, liuliu ba baze fornesimentu Suai nian, sei apoia projetu ne’e no projetu sira seluk ne’ebé atu mai, ne’ebé Governu aprova ona liu husi Planu dezenvolvimentu petrolíferu.”

Sekretáriu Estadu realsa mós katak tuir perspetiva Governu nian, knaar ANP nian, ho sira nia profisionalizmu iha administrasaun kona-ba kampu, mak sai nu’udar órgaun reguladór JPDA nian.