Teste rastreio COVID-19 ba Primeiru-Ministru Taur Matan Ruak ho rezultadu negativu
Rezultadu hosi teste rastreio ba COVID-19 ne’ebé uja métodu PCR ba Sua Eselénsia Primeiru-Ministru Taur Matan Ruak, hosi ekipa Vijilánsia Epidemiolójika no Komunitária, hatudu rezultadu.
Iha loron domingu [28/03], ekipa Vijilánsia Epidemiolójika no Komunitária hosi pilar III Ministériu Saúde nian, ne’ebé lidera hosi dra. Josefina Clarinha ba iha rezidénsia Xefe Governu nian iha Metiaut Dili, hodi hala’o rekolla amostra (cotton swab) ba Sua Eselénsia Primeiru-Ministru Taur Matan Ruak, inklui nia família, eskoltu no pesoál sira ne’ebé serbisu iha rezidénsia. Amostra hirak ne’e depois de rekolla transporta ba Laboratóriu Nasionál, hodi submete ba teste uza métodu PCR, atu identifika vírus SARS-COV2 ne’ebé kauza moras COVID-19. Nune bele antisipa karik mak positivo, bele foti medidas hanesan izolamentu, hodi prevene atu la hada’et ba ema seluk.
Felizmente rezultadu laboratorial hafoin oras 24, hatudu Sua Eselénsia Primeiru-Ministru no nia família inklui ema sira ne’ebé teste hamutuk, hatudu rezultadu negativu. Teste ida ne’e ba dala rua ona, hafoin teste dahuluk iha loron 8 fulan marsu tinan 2021.
