Primeiru-Ministru Taur Matan Ruak Simu iha audiénsia Embaixadór foun EUA, C Kevin Blackstone
Dili, loron 25 fulan-marsu tinan 2021 – Sua Eselénsia Primeiru-Ministru Taur Matan Ruak, kinta ne’e iha Palasiu Governu-Dili, simu iha audiénsia ba dahuluk, Embaixadór foun Estadus Unidus nian ba Timor-Leste, C Kevin Blackstone, ne’ebé foin entrega kredensial ba Prezidente Repúblika iha loron 19 fulan-marsu ne’e, ofisíalmente nu’udar Embaixadór Estadu Unidus nian ne’ebé troka nia antesesór, Kathleen M. Fitzpatrick.
Xefe Ezekutivu hahú fó bem-vindu no votu felisitasaun ba Embaixadór Blackstone ba nia nomeasaun nu’udar Embaixadór foun ba Timor-Leste, enkuantu Embaixadór Kevin Blackstone agradese no sente kontente no orgullu bele reprezenta Estadus Unidus iha Timor-Leste. Embaixadór ne’e hatutan, antes atu mai Timor-Leste, nia estuda uitoan kona-ba Timor na luta Timor-Leste nian, no nia admira tebes ho Timor-Leste nia istória, no partikularmente nia orgullu ho dixiplina, sakrifísiu no vizaun atual Primeiru-Ministru Taur Matan Ruak nian.
Entretantu durante audiénsia ne’e, Xefe Governu no Embaixadór EUA fahe ideias kona-ba kooperasaun bilateral país rua nian atualmente no ba oin nian. Tanba Embaixadór foin foun iha Timor-Leste, Xefe Governu, aproveita fahe uitoan kona-ba situasaun polítika no ekonómika rai laran iha tinan sira ikus ne’e, prioridade sira Governu nian, no situasaun pandemia surtu virus korona, atu Embaixadór bele apar ho situasaun sira refere.
Enkuantu hafoin audiensia ho Xefe Governu, Embaixadór Blackstone, ba imprensa sira esplika, reuniaun ho Xefe Governu di’ak tebetebes, hodi nia anunsia programa foun USAID nian ba tina liman oin mai ho montante dólar amerikanu millaun 93, tanba haree ba Timor-Leste ho Estadus Unidus iha prinsípiu ne’ebé hanesan kona-ba kompromisu ba demokrasia, defende diretu ema nian no boa governasaun.
“Enkontru ho Primeiru-Ministru, enkontru ne’e exelente tebes, rona kona-ba Primeiru-Ministru nia prioridade sira, entaun Estadus Unidus koopera ho Timor-Leste di’ak tebetebes atu responde ba prioridades ne’ebé ohin Primeiru-Ministru hato’o. De faktu ohin dadeer ne’e ba dahuluk ha’u anunsia programa dezenvolvimentu estratéjiku foun hosi USAID nian ba tinan lima nian ho montante dólar amerikanu millaun 93. Programa foun ne’e sei kolabora ho Ministériu sira relevante atu suporta prioridade sira Governu nian ba dezenvolvimentu ekonómiku, no espesiál sei konsentra ba feto, jovem no grupu vulnerável sira”, dehan Embaixadór Blackstone.
Liután nia esplika, Governu Norte Amerikanu mós fó asisténsia ba área Saude, hahú hosi 2020 to’o 2022, ne’ebé providénsia ona dólar amerikanu millaun 6 hodi suporta Timor-Leste nia sistema kuidadu saúde no nia infraestrutura sira, inklui item ida própriu ba programa luta kontra COVID-19 ho orsamentu hamutuk dolar amerikanu millaun1.6.
Ikus liu Embaixadór Blackstone esplika, nia hakarak iha nia mandatu ne’e, atu finaliza lalais prosesu dokumentu sira hodi bele iha ona nota entendimentu ho Governu Timor-Leste atu bele realiza rehabilitasaun ba aeroportu Baukau, tuir pedidu Governu Timor-Leste nian iha tinan 2018, ne’ebé hetan aprovasaun iha reuniaun defeza iha Hawai.
Asisténsia ne’e iha dolar amerikanu millaun 10, ne’ebé atu finansia ba hadi’a pista aeroportu nian, moru protesaun, armazén ba karreta Bombeirus, inklui avioneta cessna ne’ebé sei fasilita Governu Dili hodi uja ba kontrolu área espasu marítima Timor nian. Embaixadór ne’e akresenta, apoiu ne’e la iha intensaun seluk, hodi hatutan apoiu refere iha ámbitu atu sinkroniza ho apoiu hosi Austrália nian ne’ebé atu fó oferese roo patrulla rua ba Timor-Leste.
