Ministériu Finansas halo ona Pagamentu Cesta Básica ba kompañia 25 ho montante totál US$ 5.257.302
Ministériu Finansas (MF) liuhusi Sekretariadu Tékniku Fundu COVID-19, to’o ohin loron, Kinta-feira, 25 marsu 2021 , realiza ona pagamentu Cesta Básica ba kompaña lokál hamutuk rua-nulu-resin-lima (25) ho montante totál US$ 5.257.302 (númeru no montante ne’e inklui ona pagamentu ba kompaña 11 ne’ebé mak MF halo ona pagamentu iha sesta-feira, 19 marsu 2021).
Pagamentu ne’e halo hafoin MF simu pedidu pagamentu husi Ministériu Turizmu, Komérsiu no Indústria (MTCI) hamutuk 49. Husi pedidu pagamentu 49 ne’e, MF realiza ona pagamentu hamutuk 25. Pedidu pagamentu 11 sei realiza iha tempu badak nia laran. Pedidu pagamentu 13 mak haruka fila-fali ba MTCI atu kompleta rekezitus pagamentu tuir Lei haruka, molok MF realiza pagamentu.
Aleinde ne’e, MF mós simu ona pedidu pagamentu hamutuk 24 husi Sekretaria Estadu Kooperativa (SeKoop). Husi númeru ne’e, pedidu pagamentu 9 mak sei realiza nia pagamentu iha tempu badak nia laran. Pedidu pagamentu 15, haruka fila-fali ba SeKoop atu kompleta rekezitus pagamentu tuir Lei haruka , molok MF realiza pagamentu.
Iha semana ida-ne’e nia laran, MF mós simu ona pedidu pagamentu hamutuk 16 husi Sentru Lojístiku Nasionál. Maibé, Sekretariadu Tékniku Fundu COVID-19, MF tenke haruka fila-fali ba Sentru Lojístiku Nasionál atu kompleta rekezitus pagamentu tuir Lei haruka , molok realiza pagamentu.
Ministériu Finansas liuhusi Sekretariadu Tékniku Fundu COVID-19, kontinua serbisu hamutuk ho Ministériu Implementadór programa Cesta Básica atu aselera prosesu pagamentu ba kompaña sira ne’ebé mak fornese ona ai-han ba programa Cesta Básica.
Bainhira dokumentus pedidu pagamentu kompletu, loos no prienxe ona rekezitus pagamentu tuir Lei haruka, Sekretariadu Tékniku Fundu COVID-19 sei prosesa no sei realiza pagamentu tuir regras ne’ebé vigora.
Maibé , molok Sekretariadu Tékniku Fundu COVID-19 realiza pagamentu, kompaña sira hotu tenke kumpre sira nia dever hodi ba selu sira nia impostu rendimentu (income tax) 0,5% husi sira nia totál rendimentu konforme Lei Tributária haruka. Kompaña sira tenke aprezenta sira nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.
Karik kompaña fornesedór-sira iha pergunta ruma ka presiza informasaun liután kona-ba asuntu impostu, bele dirije diretamente ba Autoridade Tributária (AT) ka bele vizita portál AT www.attl.gov.tl relasiona ho (i) pagamentu impostu, (ii) submisaun relatóriu mensál/anuál no (iii) pedidu emisaun ba Certidao de Dividas . Hakarak atu informa mós katak pagamentu impostu sira ne’e, bele halo liuhusi mákina ATM P24 . Signifika, kontribuinte sira la-presiza ba forma tan iha banku komersiál sira hanesan uluk.
