Governu Timor-Leste

Governu Timor-Leste liu husi Ikipa Negosiador ne’ebé lidera husi Ministru Koordenadór Asuntu Ekonómikus (MCAE), Eng. Joaquim Amaral halo hela preparasaun hodi partisipa iha Enkontru Daruak Negosiasaun  Nivel altu nian husi  Grupu Traballu OMK nian "Second Working Party Meeting "  ne’ebé  tentativamente sei realiza iha Junu 2021.

Iha loron 1 outubru 2020, Timor-Leste partisipa tiha ona enkontru dahuluk negosiasaun nivel altu nian husi Grupu Traballu ne’ebé estabelese iha loron  7  dezembru  2016.  Ikipa Grupu Traballu husi Timor -Leste ne’ebé antes ne’e elabora no prepara dokumentus kona-ba adezaun Timor-Leste ba OMK hetan ona apresiasaun a'as  husi membrus OMK sira no mos Sekretariadu OMK iha Jenebra. Hare ba seriedade Governu Timor-Leste hodi bele adere ba OMK, Sekretariadu OMK iha Jenebra kuntinua husu Timor-Leste nia disponibilidade hodi partilla esperiensia kona-ba oinsa bele organiza Enkontru Grupu Traballu  bele lao ho susesu.  Kompara ho Somalia ne’ebé hahu’u planu "First Working Party Meeting" husi Dezembru 2016 maibe to’o agora sidauk realiza. Ho'o nune’e, Sekretariadu OMK hakarak tebes atu  rona rasik oinsa Timor Leste nia esperensia liuhusi  enkontru   Second Working Party Meeting.

Haktuir husi publikasaun ne’ebe fo sai husi WTO Accessions News Letter, edisaun 104-Marsu 2021, Grupu Traballu adezaun Timor-Leste ba OMK  oras nee finaliza hela faze negosiasaun konaba kontribuisaun hotu inklui resposta eskrita bazeia ba perguntas hotu ne’ebe hato’o husi pais membrus OMK nian.

Komponente husi resposta hirak ne’e sei kobre konaba faze inisiu hodi asesu ba merkadu liuhusi bens serbisu ne’ebe mak iha inklui Planu Asaun Lejislasaun nian  no mos lista verifikasaun konaba adezaun nian hamutuk ho kuestionariu ho tabela apoiu agrikultura nian.

Informasoens hotu husi perguntas nee,  Ikipa Negosiasaun adezaun Timor-Leste ne’ebé lidera husi Ministru Koordenadór Asuntu Ekonómikus (MCAE)  sei haruka ba Sekretariadu OMK  iha Jenebra, Suíça hodi sai  baze diskusaun konaba rejime komerisu eksternal Timor-Leste nian. Kompozisaun Ikipa nagosiasaun ne’ebé lidera husi  Ministru Koordenadór Asuntus Ekonómikus (MCAE) , reprezenta mos husi  instituisaun estadu xave hanesan Ministériu Negósius Estranjeirus no Kooperasaun (MNEC), Ministériu Turizmu, Komérsiu no Indústria (MTCI), Ministériu Petróleu no Minerais (MPM) ,Ministériu Agrikultura no Peskas (MAP), Ministériu Saúde (MS) no Ministériu Finansas (MF). Iha parte seluk, ikipa negosiasaun halo mos konsultasaun ho partes relevantes sira seluk  hodi bele sai mos nain ba prosesu nee hotu, hodi hetan mos apoiu husi   Ministériu Obras Públikas (MOP), Ministériu Transportes no Komunikasoins (MTC) ,Banku Sentral Timor-Leste (BCTL) inklui setor privadu,organizasoens  sosiadae sivil  no parseirus dezenvolvimentu sira.

Aleinde kontinua negosiasaun iha nivel multilateral nian, dokumentu input negosiasaun ne’ebé foin finaliza sei sai hanesan baze ba Timor-Leste nia negosiasaun bilateral no plurilateral ho Membru OMK sira.

Iha preparasaun ba negosiasaun bilateral nian, membru ekipa negosiasaun balun foin lalais kompleta treinamentu virtual ba Services Sector, hamutuk ho paizes observador seluk, ne’ebé fornese husi Sekretariadu OMK. Objetivu husi treinamentu refere mak hodi fasilita Ekipa Negosiasaun iha preparasaun ba Services Negotiations ne’ebé sei realiza iha tinan ne’e nia laran.

Oras ne’e, Governu Timor-Leste hamutuk ho pais 22 sira seluk sai paizes observador hodi akompaña prosesu tomak konaba rekezitus atu sai membru OMK  hanesan ho 164 paizes sira seluk. Organizasaun  Mundial Komérsiu (OMK) nu’udar organizasaun ne’ebé trata konaba regras komérsiu  entre nasaun ho objetivu hodi  garanti atividades komersial hotu lao ho livre ho nia predisaun hotu.