Governu Timor-Leste

Dili, 22 marsu 2021 (SRP), Vise-Ministru Interior (VMI), Antonio Armindo, simu vizita badak husi Sekretáriu Estadu ba Komunikasaun Sosiál (SEKOMS), Merício Juvinal dos Reis (Akara), hodi kolabora servisu hamutuk fó apoiu hodi kombate HOAX ka lia falsu iha ambitu COVID-19, ne’ebé maka agora ne’e lao makas loos iha ita- nia rain.

“Ohin ami nain rua Vise-Ministru Interior ko’alia ona oinsa tau ideas hamutuk para identifika hoax ka lia falsu sira no diskuti oitoan estratéjia atu kombate hoax iha situasaun COVID-19 nia laran”, dehan Merício Juvinal dos Reis hafoin remata enkontru ne’e iha Ministeriu Interior, Vila-Verde, segunda ne’e.

Mericio esplika, SECOMS hakarak iha estratejia ida ne’ebe diak tanba ema hahú lansa informasaun barak no koko atu halo komunidade la fiar informasaun ne’ebé Governu fó sai ona.

“Komunidade sira paniku ho lia falsu sira ne’e, hafoin sira ko’alia hasoru governu bazeia ba lia falsu nune’e mosu dezintendementu entre ita hodi lafiar malu no hakilar malu. Tanba ne’e maka laos ko’alia de’it ho Vise-Ministru Interior maibe sei ko’alia mós ho ministériu relevante seluk para tau esforsu hamutuk katak kombate hoax ou lia falsu ne’e servisu ita nian hotu. Daudaun ne’e, ami mós sei ko’alia ho orgaun komunikasaun sira para ajuda públiku kona-ba oinsa prepara ita-nia sidadaun atu uza plataforma online ho pozitivu no responsabilidade”, nia haktuir.

Entertantu Vise-Ministru Interior, Antonio Armindo, hateten nia parte sei koordena ho parte PNTL hodi hare asuntu refere.

“ Ita hotu hatene katak hoax sai ameasa boot ida, liu-liu ambiente COVID-19 nia laran tanba ema aproveita hodi espalla informasaun falsu. Tanba ne’e koordenasaun servisu importante no husi parte Ministeriu Interior prontu kolabora hamutuk ho PNTL hodi identifika no evita HOAX ne’ebé espalla iha komunidade nia leet”, dehan Vise-Ministru Antonio Armindo.

Iha okajiaun ne’e, VMI mos husu atu ba komunidade sira, hahu husi nivel estudandante, joventude no sosiedade em jeral, atu fiar deit husi fontes ne’ebé kredivel katak, mai husi instituisaun ne’ebé maka iha autoridade atu hato’o informasaun hanesan husi Ministeriu Saude sira maka, iha autoridade atu hato’o informasaun loloos ligadu ba iha COVID-19 no  rezeita fahe tutan informasaun falsu hodi evita sosiedade konsume informasaun ne'ebé laloos.

Iha biban ne’e, Vise-Ministru Antonio Armindo fo apresiasaun ba SECOMS ne’ebe esforsu makas servisu ho entidades tomak kombate hoax.