Governu hahú fahe ajuda umanitária ba estudante universitáriu sira ne’ebé maka presiza liu
Governu Konstitusionál VIII, ohin, loron 21 fulan-marsu tinan 2021, hahú ona kampaña fahe ajuda umanitária ba estudante sira husi Instituisaun ensinu superiór sira, ne’ebé maihusi munisípiu sira no labele sai husi Dili, tanba serka sanitária ne’ebé impoin hela iha munisípiu ne’e.
Iha loron ne’e, entrega ona apoiu ai-han ba estudante sira husi Dili Institute of Technology (DIT), husi Institute of Business (IOB), husi Universidade da Paz (UNPAZ) no husi Institutu Superior Cristál (ISC) no iha semana oin, Governu Konstitusionál VIII, liuhusi Ministériu Solidariedade Sosiál no Inkluzaun, sei kontinua fahe ajuda umanitária ba estudante sira husi instituisaun ensinu superiór públika no privadu sira seluk.
Serimónia entrega ajuda umanitária nian ne’e prezide husi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos, no partisipa mós iha serimónia ne’e maka Ministru Ensinu Superiór, Siénsia no Kultura, Longuinhos dos Santos, Vise-Ministra Solidariedade Sosiál no Inkluzaun, Signi Chandrawati Verdial, no Vise-Ministru Administrasaun Estatál, Lino de Jesus Torrezão.
Iha ámbitu apoiu ida-ne’e nian, kada estudante, ne’ebé Ministériu Solidariedade Sosiál no Inkluzaun no Ensinu Superiór, Siénsia Kultura resjista ona, sei simu foos ka’ut ida.
Vise-Primeira-Ministra hatete katak “Governu halo intervensaun ida-ne’e atu tulun estudante sira ne’ebé maka hasoru hela situasaun difisil”, “tanba durante serka sanitária iha Dili, estudante sira labele simu apoiu husi sira-nia família”. Iha loron dahuluk ne’e, “fahe ona apoiu ba estudante sira husi DIT hamutuk 373, IOB hamutuk 726, UNPAZ hamutuk 1510 no ISC hamutuk 84”, no durante semana ne’e sei fahe tan ba estudante sira seluk ne’ebé maka presiza.
