Kooperasaun Interministerial ba Dezenvolve Turizmu iha Timor-Leste
Ministériu Turizmu, Komérsiu no Indústria (MTKI) no Ministériu Edukasaun (ME), liu husi Sekretaria Estadu Kultura (SEC), asina Karta Entendimentu ba atu dezenvolve hamutuk Turizmu iha Timor-Leste nebé fundamental Timor-Leste nia valores kulturais
Durante seremónia asinatura ba Nota de Entendimentu nebé halao iha Dili Segunda-Feira (26/04), Ministru Komérsiu no Indústria (MTKI), Gil da Costa Alves, hateten “Turizmu integradu ho kultura no tradisaun Timor –Lesta ninian mak dalan diak liu ba atrai turistas mai Nasaun foun ne’e, liu-liu ba sira nebé hakarak apresia Timor-Leste nia panorama turistiku nebé furak, hakarak atu konhese didiak liu tan rai ne’e nia história, ritus tradisionais no kulturais nebé riku tebe-tebes”.
Iha tempu hanesan, Ministru Edukasaun João Câncio Freitas aproveita oportunidade ne’e hodi agradese ba disponibilidade MTKI hamutuk ho ME bele tau matan efikaz liutan ba preserva património kultural Nasaun Timor-Leste ninian. Pasu ba dala uluk husi (ME) mak hahú ona eskola vokasional iha área hospitalidade hodi fo apoiu ba sektor turismo.
Asina akordu ida ne’e, asiste husi Sekretariu de Estadu Kultura ninian Virgilio Smith no Diretor Nasional Turismo José Quintas, no diretores nasionais seluk tan husi Ministériu rua ne’e.
