Governu Timor-Leste

Ministériu Finansa, iha loron sexta-feira liu ba, hala’o serimónia despedida ba bolseiru na’in ruanulu ne’ebé ba Austrália hodi halo implementasaun/realizasaun kona-ba susesu reforma ministeriál boot ida, iha área kapasitasaun liu husi programa PDP (Professional Development Program), ne’ebé lansa tiha ona hahú kedas iha meadu tinan 2008.

Bolseiru foin sa’e sira ne’e, hamutuk ema na’in ruanulu (mane no feto), sei ba hamutuk ho bolseiru na’in rua ne’ebé ba tiha ona hahú fulan Fevereiru tinan ida ne’e. Estudantes bolseiru sira hamutuk na’in ruanulu resin tolu ne’ebé mak sei ba estuda iha Universidade Flanders, Adelaide, South Austrália, iha área ekonomia, kontabilidade no impostu.

Prosesu selesaun hala’o besik tinan ida ba mestradu (ema na’in hat) ba lisensiatura (ena na’in sanulu resin sia). Ida ikus ne’e, sei hala’o hela prosessu finalizasaun vistu ba ema na’in rua.

Kandidatu ba Lisensiatura (Under Graduate) hamutuk na’in nenulu resin ida, ne’ebé na’in limanulu resin tolu liu ona husi ezame administrativu no sira tuir prova ho teste eskritu. Husi sira hirak ne’e, na’in ruanulu mak liu no ida rezigna tiha an.

Kona-ba kandidatura ba Mestradu (Post Graduate), husi kandidatu na’in sanulu resin ida, na’in sanulu mak selesionadu /elijível ona, maibé sira na’in hat de’it mak deside atu kontinua estuda ba Mestradu. Sira na’in rua ba tiha ona iha fulan Fevereiru, sira seluk sei ba iha semana ida ne’e.

Molok atu hahú sira nia estudu, bolseiru sira ne’e sei submete ba períodu formasaun intensiva ida iha lian inglés ba fin akadémiku nian iha “ Intensive English Language Institute” iha universidade ida ne’e duni, durante periodu másimu tinan ida, konforme grau kapasidade estudante idak-idak nian.