Ministru Prezidénsia Konsellu Ministrus hala’o sorumutuk ho responsavel IFC nian iha Timor-Leste
Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk ho responsavel husi Korporasaun Finanseira Internasionál (IFC, sigla iha lian inglés) iha Timor-Leste, SoneathHor, iha loron 5 fulan-marsu tinan 2021, iha Palásiu Governu, iha Dili.
Durante sorumutuk, Ukun-na’in ne’e no responsavel IFC nian ko’alia kona-ba projetu kooperasaun konjunta ne’ebé bele halo no projetu sira ne’ebé maka la’o hela hanesan konstrusaun Portu Baía Tibar no projetu reabilitasaun Aeroportu Internasionál Prezidente Nicolau Lobato nian, ne’ebé konta ho apoiu husi IFC iha kriasaun parseria públiku-privadu sira.
Ministru Prezidénsia Konsellu Ministrus ne’e destaka aprovasaun ne’ebé foin dadaun ne’e halo iha Parlamentu Nasionál ba proposta lejizlativa lubuk ida husi Governu, hanesan rejime jurídiku arbitrajen voluntária, rekoñesimentu ba sentensa arbitrál estranjeira sira no alterasaun ba Kódigu Prosesu Sivíl, ne’ebé buka atu kontribui ba hadi’a ambiente negósiu nian sira, bainhirai permite rezolusaun konflitu sira ho lalais liután, hodi promove konfiansa husi parseiru esternu sira no hamenus impedimentu sira ba sira-nia investimentu iha país ne’e.
Iha ámbitu Programa Reforma Administrasaun Públika nian, Fidelis Magalhães define ona hanesan prioridade sira ba prazu badak, melloria no simplifikasaun ba prosesu lisensiamentu emprezariál no prosesu avaliasaun ba proposta investimentu nian sira no dezenvolvimentu identifikadór úniku (Úniku ID) nian no Governasaun eletrónika (e-Government).
