Governu Timor-Leste

Governu Timor-Leste liu husi Ministra Justiça, Lúcia Lobato, iha Sexta-feira, loron 16 fulan Abril Tinan 2010 Reprezenta Estadu Timor-Leste hodi partisipa iha sorumutu Konsellu Seguransa ba dala 6299 iha salaun konferensia Nasoens Unidas nian ne’ebé hala’o iha Nova Yorque hodi deskuti kona-bá estratéjia hametin Paz iha nasaun pós-konflitu sira.

Iha sorumutu ne’eba Nasaun Afganistaun, Sierra-Leone no Timor-Leste nu’udar nasaun pós-konflitu, fahe mos esperiénsia kona-ba oin sá atu hametin Paz no estabilidade iha nasaun laran.

Ministra Lúcia Lobato iha ninia intervensaun iha sorumutu ne’ebá hateten katak “Atu fó solusaun ba hametin Paz na estabilidade iha nasaun laran presiza iha diálogu polítiku inklusivu ida, presiza determina prioridade nasionál sira ne’ebé loos iha vizaun fléxivel ida ba tempu naruk no respeitu ba lei no orden.”

Iha biban ne’ebá Ministra akresenta mós kona-ba Timor-Leste ho aten brani hodi hola inisiativa sai nu’udár uma nain no organizadór ba Konferénsia Internasionál durante loron ha’at iha Dili, loron 7 – 10 fulan Abril tinan 2010 hodi halibur parseiru denzenvolvimentu nian, Estadu Frágil no Diálogu Internasionál hodi koalia hamutuk ba problema sira ne’ebé hasoru nomós buka dalan atu kore a’an hosi konflitu. Iha sorumutu ne’e, hetan apresiasaun pozitivu husi nasaun partisipante.

Aleinde ne’e, informa mós susesu ne’ebé mak Timor-Leste iha nu’udar Nasaun pós-konflitu hodi rezolve problema bo’ot balun iha rai laran hanesan deslokadu sira, aihan ludún iha, foos folin ne’ebé karun, reforsa seguransa rai laran, rekoñesimentu ba erói sira, hametin Relasaun ho Indonésia liu hosi Komisaun Verdade no Amizade nomós halo diálogu intensivu entre lideransa nasaun rua ne’e nian.

Atu hetan tan informasaun, klik iha-ne’e.