Ministru Prezidénsia Konsellu Ministrus no Diretór-Jerál INAP nian diskute reestruturasaun ba institutu ida ne’e
Ministru Prezidénsia Konsellu Ministrus nian, Fidelis Manuel Leite Magalhães, hala’o sorumutuk ho Diretór-Jerál Institutu Administrasaun Públika (INAP) nian, Agostinho Letencio de Deus, iha loron 1 fulan-fevereiru tinan 2021, iha Palásiu Governu, Dili, hodi debate kona-ba prioridade sira iha tempu badak instituisaun nian. Enkontru ne’e mós konta ho prezensa Koordenadór Gabinete Reforma Administrativa (GRA), Fausto Gama.
INAP ne’e, institutu nasionál ne’ebé tutela ba Ministru Prezidénsia Konsellu Ministrus nian, ho misaun atu promove dezenvolvimentu no kualifikasaun rekursus umanus Administrasaun Públika nian, no liuliu, dezenvolvimentu ba kompeténsia sira jestaun husi dirijente no xefia sira Administrasaun Públika nian. Misaun ne’e, ne’ebé kruza ho Programa Reforma Administrasaun Públika nian ne’ebé daudaun ne’e implementa hela no ne’ebé lidera mós husi Ministru Prezidénsia konsellu Ministrus. Asuntu ida ne’ebé ko’alia mós iha sorumutuk ne’e mak atu harii edifísiu foun INAP nian, ne’ebé sei sai hanesan sentru formasaun institutu públiku ida ne’e nian no iha tinan 2021 tenke hala’o ona lansamentu ba fatuk-dahuluk no fiar katak iha tinan 2022 sei prontu ona.
Governante no responsavel ba INAP nian ne’e diskute prosesu reorganizasaun ba estrutura institutu nian, atu kumpre regra ne’ebé hatuur ona iha estatutu foun instituisaun nian, atu ne’ebé aprova ona iha tinan 2017, no mós rejime jurídiku ba formadór sira. Ministru Prezidénsia Konsellu Ministrus nian fó orientasaun atu INAP, hamutuk ho GRA no ho apoiu husi Gabinete Apoiu Jurídiku, Prezidénsia Konsellu Ministrus nian, avansa ho preparasaun estratéjia organizasionál no planu reforma nian ida, ne’ebé inklui ninia reestruturasaun no realokasaun pesoál ne’ebé nesesária.
