Primeiru-Ministru observa rehabilitasaun antigu Enfermaria Pediatria Lahane
Primeiru-Ministru Taur Matan Ruak segunda lokraik ne’e, Loron 11, Fulan-Janeiru, Tinan 2021, ho akompañadu Ministra Saúde, Odete Maria Freitas Belo no nia Vise Bonifácio Maucoli dos Reis, hala’o observasaun ba rehabilitasaun Antigu Enfermaria Pediatria, Ospitál Dr. António Carvalho Lahane, hodi haree besik progresu rehabilitasaun obra refere.
Rehabilitasaun ba antigu Enfermaria Pediatria ne’e nu’udar preparasaun Governu nian iha tinan 2019 wainhira Timor-Leste hasoru hela situasaun pandemia KOVID-19, ho objetivu atu uja ba sala izolamentu ba pasiente Kovid-19 karik Timor-Leste iha kontajiu pozitivu ne’ebé grave.
Hafoin observa tiha fatin ne’e, Xefe Governu hatudu nia laran kontente ho rehabilitasaun refere tanba iha kualidade no aproveita husu atu aselera parte ki’ik ne’ebé seidauk hotu, nune’e bele utiliza iha tempu badak.
“Ohin mai haree fatin ne’e, tanba Ministériu Saúde iha tempu kotuk liubá halo rehabilitasaun ba fatin ida ne’e, entaun ohin ha’u mai haree. Ha’u kontente ho emprezáriu timoroan sira ne’ebé halo obra ne’e, mas ha’u mós husu ba Ministériu Saúde buat sira ne’ebé seidauk kompleta ne’e, serbisu lalais uitoan para kompleta tiha, se tempu badak ita bele uja ida ne’e, primeiru para ita labele hada ita-nia moras sira iha ospitál kraik (HNGV) barak liu tanba dala ruma espasu la to’o (…) entaun se ita halo akabamentu hotu tiha provavelmente ita bele uja tan ida ne’e, la’ós de’it ba moras normal mas em kazu de KOVID ne’e aumenta, ita iha ona fatin”, dehan Xefe Governu ba imprensa
Iha biban ne’ebá, Xefe Ezekutivu mós husu ba Ministra Saude ho nia ekipa, atu halo tan rehabilitasaun ba parte leten (Ospitál Lahane) ne’ebé seidauk rehabilita, nune’e bele transfere moras kontajiu sira iha Ospitál Nasionál Guido Valadares (HNGV) ba fali fatin refere, tanba HNGV daudaun ne’e ladún ona iha kondisaun liuliu espasu.
Antigu Enfermaria Pediatria ne’e hetan rehabilitasaun tomak hosi kompañia Hedge Construction Unipessoal.LDA iha fulan Maiu tinan 2020 ho fundu KOVID hamutuk montante dolar amerikanu rihun 450,153.32, daudaun ne’e progresu rehabilitasaun fíziku hotu ona inklui monta hotu ona oksijéniu paralelo ba kada sala, AC, instalasaun eletrisidade internu inklui lampu sira, enkuantu sei falta mak jardim, koneksaun ba liña eletrisidade no moru hale’u.
