Ministru Prezidénsia Konsellu Ministrus no Diplomata amerikanu diskute projetu kooperasaun nian sira
Ministru Prezidénsia Konsellu Ministrus, Fidelis Manuel Leite Magalhães, hasoru-malu ho Enkarregadu Negósius Embaixada Estadus Unidus Amérika nian, Elias Parra, iha loron 13 fulan-janeiru tinan 2021, iha Palásiu Governu.
Durante enkontru, Ministru no Diplomata ne’e halo pontu situasaun kona-ba projetu kooperasaun nian sira ne’ebé daudaun ne’e la’o hela, liuliu kona-ba programa ho ajénsia Millennium Challenge Corporation (MCC). Iha kontestu programa ne’e, daudaun ne’e halo hela estudu preparatóriu no levantamentu ba dadus ne’ebé presiza atu determina projetu sira ne’ebé sei inklui iha akordu implementasaun nian, ne’ebé tuir planu sei asina iha tinan 2021 nia klaran. Programa ne’e sei ho valór ida besik millaun dolar amerikanu 285 no sei implementa iha períodu tinan lima, ho atensaun liu ba área edukasaun, bee no saneamentu.
MCC kompaktu sira hanesan akordu ba tinan lima liuhusi ne’ebé Estadus Unidus fó subsídiu ba nasaun parseiru sira hodi apoia programa hamenus ki’ak nian sira, liuhusi kreximentu ekonómiku. Timor-Leste selesiona ona ba kompaktu MCC ida husi Konsellu Administrasaun ajénsia amerikana nian ne’e, iha fulan-dezembru tinan 2017.
Iha fulan-jullu tinan 2018, Fidelis Magalhães, ne’ebé iha tempu ne’ebá okupa kargu nu’udar Ministru Reforma Lejizlativa no Assuntus Parlamentares, asina ona, ho Vise-Prezidente Adjuntu MCC nian, Jonathan Brooks, akordu finansiamentu inisiál ida ba apoiu finanseiru ida hamutuk dolar amerikanu rihun 750 hodi harii ekipa ida, ne’ebé integra iha programa Millennium Challenge Compact, ne’ebé responsavel ba identifikasaun setór ekonómiku sira ne’ebé atu dezenvolve durante implementasaun programa ne’e nian.
Ekipa Dezenvolvimentu ba Kompaktu Governu Timor-Leste nian (CDT-TL), ne’ebé lidera husi Embaixadór Constâncio Pinto, ofisiálmente harii ona iha fulan-marsu tinan 2019.
