Governu no Parlamentu Nasionál diskute pakote lejizlativu atu simplifika rezolusaun husi disputa komersiál nian sira, atu hadi’a ambiente negósiu no atu hadi’a dezempeñu administrasaun públika nian
Ministru Prezidénsia Konsellu Ministrus, Fidelis Manuel Leite Magalhães, aprezenta ba Komisaun A, Parlamentu Nasionál, iha loron 14 fulan-janeiru tinan 2021, projetu Proposta Lei tolu, iha ámbitu prosesu reforma lejizlativa no administrativa nian. Sorumutuk ne’e hetan mós partisipasaun husi Ministru Justisa, Manuel Cárceres da Costa, no Sekretáriu Estadu Formasaun Profisionál no Empregu, Alarico do Rosário.
Inisiativa rua husi lejizlativa hirak ne’ebé aprezenta ona, liuliu Proposta Lei ne’ebé refere ba Rejime Jurídiku Arbitrajen Voluntária nian no ba Proposta Lei ba Autorizasaun Lejizlativa atu halo alterasaun ida ba Kódigu Prosesu Sivíl, sira-nia objetivu prinsipál sira mak atu hadi’a ambiente negósius no reforsa seguransa jurídika husi tranzasaun komersiál sira no kumpre ba kontratu sira.
Ho objetivu ida-ne’e mós, submete ona ba Parlamentu Nasionál Proposta Rezolusaun Parlamentu Nasionál nian ba Adezaun Timor-Leste nian ba Konvensaun Nova Yorke tinan 1958 kona-ba rekoñesimentu no ezekusaun husi sentensa arbitral estranjeira nian sira. Adezaun Timor-Leste nian ba Konvensaun ida ne’e, ne’ebé sai hanesan pilar esensiál ida arbitrajen internasionál nian, ne’ebé ratifika ona husi Estadu 161, nu’udar insentivu importante ida atu intensifika relasaun komersiál sira ho esteriór no fatór promosaun ida ba investimentu estranjeiru.
Proposta Lei sira ne’e, ne’ebé halo parte iha prosesu atu hadi’a prestasaun Justisa no iha Programa Reforma Administrasaun Públika nian, ninia objetivu mak atu kria solusaun estrajudisiál sira ba rezolusaun konflitu kontratuál sira entre privadu sira, maibé mós entre privadu sira no Estadu, kona-ba kontratu sira ho natureza privada, hodi simplifika no fó ajilidade ida boot liután iha rezolusaun judisiál ba konflitu sira ho natureza komersiál.
Proposta Lei datoluk nian, ne’ebé refere ba autorizasaun lejizlativa nian kona-ba baze jerál sira organizasaun nian husi Administrasaun Públika, buka atu hadi’a estrutura no organizasaun Administrasaun Públika nian, hodi define komponente oioin organizasaun ne’e nian no sira-nia atribuisaun, kompeténsia no relasaun nian sira. Nune’e, sei dezenvolve no moderniza aspetu sira ne’ebé presiza atu garante efisiénsia, efikásia, transparénsia, kualidade no meritokrasia ida boot liután iha Administrasaun Públika.
Iha ámbitu Programa Reforma Administrasaun Públika nian, ne’ebé lidera husi Ministru Prezidénsia Konsellu Ministrus, hala’o hela mós produsaun husi inisiativa lejizlativa sira seluk, ho objetivu atu reforsa no klarifika baze sira organizasaun nian husi Administrasaun Públika, ne’ebé fundamentál ba nia modernizasaun no atu hadi’a dezempeñu Funsaun Públika no instituisaun públika sira nian.
