Governu Timor-Leste

Iha loron 12 fulan-dezembru tinan 2020, Orsamentu Jerál Estadu nian ba tinan 2021, ho montante totál dolar amerikanu millaun rihun 1, 895, hetan ona aprovasaun iha Parlamentu ho votu afavór hamutuk 44, la iha votu kontra no la iha abstensaun.

Primeiru-Ministru, Taur Matan Ruak, iha nia intervensaun, iha aprezentasaun Proposta Lei ne’e nian, hateten katak Orsamentu Jerál Estadu ida-ne’e “dezenvolvidu atu hatán ba dezafiu sira ne’ebé mak antes ne’e nunka mosu, ne’ebé ita-nia Nasaun hasoru iha tinan 2020 nia laran”, no katak nia “Governu formula orsamentu ida-ne’e atu haburas fila fali ita-nia ekonomia, proteje no investe iha ita-nia Povu, no fó ba ita-nia foin sa’e sira oportunidade hodi integra iha sosiedade nia leet atu realiza sira-nia mehi”.

Orsamentu Jerál Estadu nian ba tinan 2021 aprezenta alterasaun metodolójika lubuk ida ne’ebé buka atu aproxima orsamentu ba prátika orsamentál internasionál sira-ne’ebé di’ak liu, hodi hadi’a kualidade konsetuál husi Orsamentu Jerál Estadu nian ne’e, hodi armoniza aprezentasaun informasaun no hodi aumenta ninia transparénsia. Despeza sira husi Orsamentu Jerál Estadu nian sei aprezenta no espesifika tuir programa sira, aleinde klasifikasaun orgánika no ekonómika ne’ebé utiliza nanis ona.

Iha ninia intervensaun ikus, iha enserramentu diskusaun OJE tinan 2021 nian, Primeiru-Ministru hatudu nia laran haksolok tanba aprovasaun ba Orsamentu ida-ne’e no agradese “kolaborasaun husi membru sira Parlamentu Nasionál nian, durante debate kona-ba OJE, hahú kedas husi diskusaun iha jeneralidade to’o ba votasaun finál globál”. Xefe Governu konsidera mós katak Orsamentu ne’e “sei hahú siklu foun ida atu normaliza siklu orsamentál anuál nian no, iha tempu hanesan, rekupera ekonomia, ne’ebé monu tanba efeitu sira husi COVID-19 no rejime duodesimál”.