Governu Timor-Leste

Institituisaun seguransa Timor-Leste, PNTL, marka tan espasu no hakerek tan página foun iha istoria desenvolvimentu sektor seguransa nasional iha Timor-Leste. Ida ne’e hatudu husi Polisia Nasional Distritu Ainaro ne’ebe ohin simu tan ona poder husi Polisia Nasoens Unidas nian.

Espasu ida ne’e laos formalidade de’it, maibe hatudu katak PNTL iha kapasidade klean nebé presiza hodi bele asegura ka fo seguransa ba povo no nasaun ida ne’e tuir lei ka konstituisaun haruka.

Prosesu entrega poder komesa kedan husi fulan Maiu tinan kotuk, komesa husi Distritu Lautém, Oe-Cusse Ambeno, Manatuto no ikus liu maka Viqueque. Entrega poder ne’e mos simu husi unidade polisia sira nian hanesan—Centru Formasaun Polísia Comoro, Unidade Polísia Marítima no mos Unidade Servisu Inteligensia Polisia Timor-Leste nian husi Polisia Nasoens Unidas.

Entrega poder ne’e la signifika katak Polisia Timor-Leste sai ona kompletu iha buat hotu, governu rekoñese katak iha buat barak maka polisia presiza atu hadia hodi fo seguransa ida ne’ebe profundu ba sosiedade, por ezemplu, polisia tenki hakbesik an’n ba povu atu nune’e bele asegura katak sira maka liman ain povu nian.

Iha serimonia ida née, Sekretariu de Estadu ba Siguransa Sr. Francisco Guterres, hateten katak; “polisia tenki hakbesik an’n ba populasaun hodi protégé sira hosi ema ne’ebe hakarak halo a’at, defende no ajuda komunidade atu rezolve sira nia problemas

Asaun konkretu ida ne’ebe ita bele haree husi kompromisu ida ne’e maka—SES kria lei rua ne’ebe naran Lei Seguransa Nasional no Lei Seguransa Interna ne’ebe foin lalais ne’e aprovadu ona iha Parlementu Nasional no promulgadu ona husi Presidente da República. Lei rua ne’e define natureza PNTL nian, hanesan Polisia Komunitária, katak—polisia ida ne’e sei uza aprosimasaun komunitariu hodi rezolve problemas iha sosiedade, no atu realiza ida ne’e polisia tenki hakbesik an’n teb-tebes ba komunidade.

Polisa Nasoens Unidas sei servisu nafatin hamutuk ho PNTL Ainaro nian hodi fo tulun - asesoria ka monitorizasaun iha áreas henesan protesaun direitus umanus, aktividades polisia komunitária nebé bazeadu ona ba meius Governu no Polisia Nasoens Unidas sira rasik hatán.

Tuie mai Polisia Distritu Baucau maka sei simu mos transferensia poder iha tempu badak.