Ministru Finansas Foun Simu Pose
Prezidente Repúblika, Francisco Guterres Lú Olo, ohin, loron 23 fulan-novembru tinan 2020, fó pose ba Ministru Finansas foun, Governu Konstitusionál VIII nian, Rui Augusto Gomes, iha Palásiu Prezidensiál Nicolau Lobato, iha Dili.
Rui Augusto Gomes, ne’ebé lidera ona komisaun responsavel ba elaborasaun Planu Rekuperasaun Ekonómika nian, substitui Fernando Hanjam, ne’ebé husik ona kargu tanba moras.
Primeiru-Ministru, Taur Matan Ruak, iha ninia diskursu, agradese no hahí ba “sentidu misaun ne’ebé aas” ne’ebé Rui Augusto Gomes hatudu ona bainhira hatán “atu asume responsabilidade governativa sira ne’ebé maka ho dezafiu boot kona-ba kargu ne’e rasik”, no hatutan mós katak Ministru Finansas foun ne’e iha “esperiénsia ida ne’ebé akadémika no profisionál, iha domíniu ekonómiku, orsamentál no finanseiru, bele destaka husi estudu sira ne’ebé dezenvolve ona kona-ba kombate pobreza, promosaun ba kreximentu ekonómiku no sosiál sustentavel, promove ba mudansa estruturál sira no iha defeza ba distribuisaun rendimentu nian sira ne’ebé justa no ekuitativa.
Xefe Governu agradese ba serbisu hirak ne’ebé maka Ministru Finansas sesante hala’o ona katak “maske empeñu no determinasaun ne’ebé nia hatudu ona bainhira hahú haknaar an iha departamentu governamentál ida-ne’ebé kompleksu tebes no sentrál liu ba funsionamentu Governu no administrasaun públika hotu nian, iha tempu ida ne’ebé maka difisil no ezijente liu, atu halo preparasaun ba proposta Orsamentu Jerál Estadu nian ba tinan 2020 no tinan 2021, nia sei la bele kontinua hala’o serbisu ne’ebé nia hahú tiha ona ho razaun tanba ninia saúde maka la permite”.
Taur Matan Ruak hato’o ninia “apresiasaun no gratidaun espesiál” ba Vise-Ministra Finansas, Sara Lobo Brites, “ne’ebé durante períodu rekuperasaun saúde Ministru Titulár nian, asume ona knaar ida-ne’e, nu’udar Ministra Finansas Interina”.
Ikusliu, Primeiru-Ministru husik hela “liafuan agradesimentu ba sidadaun hotu-hotu, traballadór, família, komunidade, emprezáriu, parseiru dezenvolvimentu no organizasaun naun-governamentál nian sira, husi imi hotu-hotu ninia apoiu no konfiansa ne’ebé fó nafatin ba ami, durante tinan 2020 difisil ne’e, rekoñese no agradese ba imi-nia “rezisténsia, rezilénsia no disiplina iha implementasaun husi medida oin-oin ne’ebé adota ona husi Governu durante tinan ne’e, no liuliu durante períodu hitu estadu emerjénsia nian ne’ebé deklara tiha ona”.
