Aprezentasaun kona-ba Relatóriu Monitorizasaun Kontratu ba Termu Sertu iha Administrasaun Públika
Ministru Prezidénsia Konsellu Ministrus nian, Fidelis Manuel Magalhães, partisipa iha loron 20 fulan-Novembru tinan 2020, nu’udar reprezentante Governu nian, hodi aprezenta no hatama Relatóriu Monitorizasaun Kontratu ba Termu Sertu iha Administrasaun Públika, ne’ebé elabora husi Provedoria Direitus Umanus no Justisa (PDHJ). Serimónia ne’e hala’o iha Auditóriu Ministériu Justisa nian, iha Díli.
Relatóriu ne’e realiza iha ámbitu kompeténsia PDHJ nian kona-ba supervizaun ba podér públiku no ba akonsellamentu iha kualkér matéria kona-ba Governasaun Di’ak. PDHJ halo ona análize ba aplikasaun kuadru legál kona-ba kontratu ba termu sertu, husi Administrasaun Públika nia parte. Verifika ona kontratu ba termu sertu ba instituisaun sira administrasaun direta no indireita Estadu nian 17, ne’ebé identifika ona katak iha organizasaun sira ne’e iha totál profisionál kontratadu 315, ne’ebé nasionál sira 243, internasionál sira 72 no mós 7 mak PDHJ la konsege determina.
Ministru Prezidénsia Konsellu Ministrus iha ninia diskursu afirma katak “Governu sei analiza ho atensaun ba Relatóriu ne’ebé aprezenta no entrega ona no sei la husik atu haree didi’ak konkluzaun no rekomendasaun sira husi relatóriu ne’e, liuliu iha ámbitu husi esforsu sira ne’ebé mak hala’o hela ba reforma sira-ne’ebé presiza ba modernizasaun Estadu no Administrasaun Públika nian no ba melloria efetiva husi legalidade, transparénsia, efisiénsia no efikásia husi Administrasaun Públika ne’e rasik”.
Fidelis Magalhães salienta mós katak “Governu dezenvolve hela esforsu sira hodi avansa ho Reforma Institusionál relevante sira iha domíniu Administrasaun Públika, Reforma Fiskál no Finanseira no mós Reforma Judisiária, nune’e mós iha matéria prosesu Desentralizasaun podér Estadu nian”.
Ministru garante katak kestaun husi funsionáriu kontratadu sira mak hetan mós konsiderasaun iha Programa Reforma Administrasaun Públika nian, ne’ebé ninia koordenasaun garante daudaun ne’e husi Prezidénsia Konsellu Ministrus no mós “ho objetivu atu hametin relasaun kustu-benefísiu iha empregu kona-ba funsionalizmu públiku no konsisténsia iha nivel pagamentu sira nian”.
Programa ne’e hakarak atu estabelese “meta no kontrolu sira ne’ebé reforsadu hodi garante viabilidade ba saláriu sira, reforsa motivasaun no atrai no retein talentu sira”. “Uzu ba kontratu iha servisu públiku sei konsistente liu no sei tau iha prátika sistema ida forte kona-ba jestaun kargu sira nian, iha ne’ebé kargu sira fiksa bazeia ba volume serbisu nian.”, nia hatutan.
