Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk, iha loron 6 no loron 10 fulan-novembru tinan 2020, ho Embaixadora Estadus Unidus Amérika (EUA) nian iha Timor-Leste, Kathleen Fitzpatrick no Embaixadór Adjuntu Embaixada EUA nian, Elias Parra.

Durante sorumutuk sira, Diplomata ne’e, ne’ebé hakotu ninia misaun iha Timor-Leste iha fulan ida-ne’e, agradese ona ba Governante ba tulun hotu kona-ba projetu sira kooperasaun husi Amérika durante iha tinan ikus hirak-ne’e , liuliu iha dezenvolvimentu programa Millenium Challenge Corporation (MCC) Compact, no hatudu ninia orgullu tanba rezultadu sira ne’ebé alkansa ona durante ninia misaun iha Timor-Leste.

Ministru Prezidénsia Konsellu Ministrus mós hato’o apresiasaun Governu nian ba tulun husi Estadus Unidus Amérika nian ba Timor-Leste durante tempu hirak ne’e, hodi ko’alia liu ba parseria iha programa ho MCC, ne’ebé lidera husi nia rasik, uluk nu’udar Ministru Reforma Lejizlativa no Asuntus Parlamentares no daudaun ne’e nu’udar Ministru Prezidénsia Konsellu Ministrus nian. Programa ne’e ninia objetivu mak atu hadi’a sidadaun sira-nia kondisaun moris nian, ho halakon deznutrisaun no rakitizmu, liuhusi, entre medida sira seluk, konstrusaun infraestrutura sira saneamentu báziku nian, infraestrutura sira ba asesu ba bee moos, adosaun programa espesífiku sira nutrisaun nian no hadi’a asesu ba servisu saúde públika nian ne’ebé iha kualidade, ne’ebé MCC sei dezenvolve. Programa ne’e hakarak mós hasa’e kualidade rekursus umanus nasionál nian liuhusi asaun formasaun vokasionál sira.

Asuntu sira seluk ne’ebé maka diskute, refere ba investimentu husi rai-li’ur, ba ida-ne’ebé Governu serbisu hela atu hadi’a ambiente negósiu sira nian, atu nune’e kria kondisaun sira ba Timor-Leste hodi atrai investimentu barak liután no promove kriasaun empregu.

Iha sorumutuk ne’e ko’alia mós kona-ba programa kooperasaun nian sira seluk Amérika nian iha Timor-Leste ne’ebé la’o hela, apoiu husi EUA iha luta hasoru COVID-19 no asuntu bilaterál sira seluk ne’ebé pendente.

Governante no Embaixadora Estadus Unidus Amérika nian ne’e hatudu ona mós konfiansa katak kooperasaun entre país rua ne’e sei kontinua metin.