Lansamentu Programa Bote Ai-han (Cesta Básica)
Governu Timor-Leste lansa ona, iha loron 27 fulan-outubru tinan 2020, programa Bote Ai-han (Cesta Básica), iha Suku Sabuli, iha Metinaru, Dili. Bote ai-han ne’e fó ba populasaun tomak iha fulan-novembru no fulan-dezembru tinan 2020 no ho valór to’o dolar amerikanu 25 ba ema ida-idak ba fulan ida-idak ne’ebé temi ona.
Ida-ne’e hanesan inisiativa ida iha ámbitu Planu Rekuperasaun Ekonómika, ne’ebé fornese ai-han no produtu sira ba ijiene pesoál nian ba populasaun hotu iha nasaun laran. Objetivu boot husi medida ida-ne’e mak atu tulun família sira hodi hatán ba sira-nia nesesidade bázika sira, hodi kontribui ba halakon hamlaha no vulnerabilidade boot liu hirak ne’ebé eziste iha rejiaun balun husi país ne’e, ne’ebé kiak no izolada liu, aleinde objetivu ida ne’ebé mak apoiu ba agrikultór, produtór no komersiante lokál sira, atu estimula dinámika ekonómika lokál sira, liuhusi sirkulasaun rekursu finanseiru sira ne’ebé nesesáriu atu hasa’e produsaun nasionál, hodi redús impaktu sira husi krize ekonómika.
Implementasaun programa ne’e nian sai nu’udar responsabilidade Ministru Koordenadór Asuntus Ekonómikus nian, liuhusi serbisu hamutuk ho Ministériu Turizmu, Komérsiu no Indústria, Ministériu Agrikultura no Peskas, Sekretaria Estadu Kooperativas, Sekretaria Estadu Ambiente, Autoridade Rejiaun Administrativa Espesiál Oekusi Ambenu no Sentru Lojístiku Nasionál, no mós ho servisu públiku sira seluk ne’ebé relevante no instituisaun sira ne’ebé la pertense ba Administrasaun Públika.
Lista produtu nian sira ne’e simu validasaun husi Ministra Saúde, ne’ebé mak konsidera liuliu, ba nia valór nutrisionál no sanitáriu. Elaborasaun lista kona-ba xefe família sira no númeru totál husi membru uma kain benefisiáriu sira ba bote ai-han, nune’e mós organizasaun kona-ba oinsá fahe bote ai-han hirak ne’e, sai nu’udar responsabilidade Ministru Administrasaun Estatál nian, serbisu hamutuk ho autoridade no administrasaun munisipál no suku sira.
Ministra Solidariedade Sosiál no Inkluzaun disponibiliza rede nasionál sentru solidariedade sosiál nian sira, iha munisípiu sira, atu apoia asaun distribuisaun bote ai-han nian ne’e no Autoridade Rejiaun Administrativa Espesiál Oekusi Ambenu koordena implementasaun bote ai-han iha ninia sirkunskrisaun territoriál ne’e.
