Ministru Prezidénsia Konsellu Ministrus no Embaixadór Austrália diskute área kooperasaun sira ba períodu tinan 2020-2021
Ministru Prezidénsia Konsellu Ministrus, Fidelis Manuel Leite Magalhães, ohin, loron 26 fulan-outubru tinan 2020, hala’o sorumutuk ho Embaixadór Austrália nian iha Timor-Leste, Peter Roberts.
Enkontru ne’e nia objetivu mak atu debate área prioritária sira hodi halo planeamentu ba inisiativa kooperasaun Austrália nian ho Timor-Leste ba períodu tinan 2020-2021, iha ámbitu planu dezenvolvimentu nian kona-ba resposta ba COVID-19 iha Timor-Leste no Akordu Planeamentu Estratéjiku ba Dezenvolvimentu Austrália-Timor-Leste, ne’ebé tenke konsidera Polítika Ajuda Esterna Timor-Leste nian, dokumentu ne’ebé Governu hakarak utiliza nu’udar referénsia atu aliña atividade parseiru dezenvolvimentu nian hotu-hotu ho prioridade sira Governu nian, atu define diretrís foun ba aprovasaun, atu nune’e bele iha koordenasaun atividade ida ne’ebé di’ak liu, no integra projetu lubuk ida ne’ebé finansiadu husi parseiru dezenvolvimentu nian sira iha sistema nasionál planeamentu no orsamentu nian.
Durante sorumutuk ne’e, sira debate kona-ba parseria sira entre Timor-Leste no Austrália ne’ebé daudaun ne’e la’o hela, liuliu asisténsia téknika ne’ebé disponibiliza ba programa Governu nian atu fó apoiu osan ba uma kain sira, iha ámbitu pandemia COVID-19, ne’ebé ninia prosesu pagamentu ba reklamasaun sira daudaun ne’e finaliza hela, no mós área prioritária sira kooperasaun nian ba futuru, liuliu ligasaun fiu fibra ótika nu’udar projetu ida ne’ebé transformadór no nesesáriu tebes ba dezenvolvimentu nasionál.
Austrália nu’udar parseiru dezenvolvimentu importante ida ba Timor-Leste, ne’ebé fó apoiu ba nasaun ne’e iha setór oin-oin, liuliu iha setór saúde, protesaun sivíl, governasaun di’ak, infraestrutura no redusaun violénsia kontra feto no labarik. Iha períodu tinan 2020-2021, Austrália hakarak lansa inisiativa foun sira saúde nian no infraestrutura nian, ho objetivu atu tulun kondisaun saúde nasionál no rekuperasaun ekonómika.
