Governu Timor-Leste

Governu, liuhusi Ministru Prezidénsia Konsellu Ministrus, Fidelis Manuel Leite Magalhães, iha reprezentasaun Primeiru-Ministru, Taur Matan Ruak nian no akompaña husi membru sira Governu Konstitusionál VIII, aprezenta ona Planu Rekuperasaun Ekonómika ba Parlamentu Nasionál, ohin, loron 20 fulan-outubru tinan 2020.

Durante sesaun plenária ne’e, membru sira husi Governu no Parlamentu Nasionál nian, debate ona rezultadu sira pakote estímulu no resposta ekonómika hodi hatán ba efeitu negativu sira husi koronavírus nian iha ekonomia, ne’ebé aprova ona iha fulan-abril tinan 2020, kompostu husi 19 medidas estratéjikas hodi fó apoiu ba família no empreza sira, no diskute mós Planu Rekuperasaun Ekonómika nian, kompostu husi medidas 71 ba kurtu prazu no médiu prazu nian, hodi rekupera ekonomia nasionál, ne’ebé afeta husi pandemia KOVID-19, maibé mós ho objetivu atu dezeña medida sira polítika públika nian ne’ebé ajuda ba transformasaun nesesária ekonómika no sosiál nasionál nian, hodi halo Timor-Leste la’ós de’it país ida ho rendimentu boot, maibé mós hanesan ho país dezenvolvidu sira, ho ema nia moris ne’ebé di’ak liu.

Ministru Prezidénsia Konsellu Ministrus, iha ninia intervensaun iha abertura debate ne’e, hahú hatete katak “durante tinan 2020, ita-nia país hasoru dezafiu istóriku sira no sein presedente”, hodi tama “iha tinan ho restrisaun orsamentál sira ne’ebé maka limitada tebes”, tanba “impase polítiku estraordináriu” no ba KOVID-19, ne’ebé deklara pandemia internasionál iha fulan-fevereiru no ho Timor-Leste rejista kazu dahuluk iha fulan-marsu nia rohan.

Ministru ne’e fó hanoin katak “Timor-Leste hanesan país 23 ne’ebé la iha ema mate husi KOVID-19”, ne’ebé permite katak “ita-nia sidadaun sira, einjerál, bele hala’o fali sira-nia moris hanesan baibain” enkuantu “ita haree husi país seluk, risku no ki’ak sira, ne’ebé sofre ho pandemia ida-ne’e, hodi aumenta númeru husi mate sira, no hodi sofre ho konfinamentu beibeik no luta polítika sira”, ida ne’e maka “senáriu ne’ebé ema barbarak hein hanesan mós iha ne’e”.

 “Ita tenke konsidera hanesan istória susesu internasionál nian ida, hanesan ita-nia país hasoru no ninia reasaun ba krize ne’e. Ohin, Timor-Leste ninia moris pratikamente fila ona ba normál. La hanesan ho Europa. La hanesan iha Amérika Norte. La hanesan iha Amérika Sul. No, infelizmente, la hanesan iha sudeste aziátiku no iha parte barak Ázia nian”, hatete Ukun-na’in ne’e.

Fidelis Magalhães hateten katak “revizaun iha previzaun sira aas ba kreximentu Timor-Leste hatudu katak intervensaun Governu nian la’o loos ona”, tanba iha inísiu pandemia nian, komunidade internasionál (...) prevee katak Timor-Leste sei hetan difikuldade sira liuliu kona-ba saúde no ekonomia, no númeru sira ne’e hatudu katak Timor-Leste iha nivel daruak risku aas liu iha rejiaun hotu”. Ne’e la akontese, Governu iha “tempu ida badak tebes ” mobiliza osan “dolar amerikanu millaun 91,7 hodi implementa medida 19 ba resposta ekonómika diversifikada”.

 “Karik la iha medidas ka resposta ida ne’ebé maka tarde no kmaan husi parte Governu nian, maka ema mate no moras sira KOVID-19 nian sei afeta makaas família sira, sosiedade no ekonomia, iha tempu hanesan aumenta nivel kiak no dezigualdade iha rendimentu sira, dehan Ministru, hodi hatutan katak” ita konsege kontrola ‘tempestade ida perfeita’ no xoke ekonómiku boot tebes iha ita-nia istória independénsia nian, tanba asaun polítika ne’ebé mak brani, liuliu tanba konsensu polítiku ida ne’ebé forte”.

Kona-ba planu rekuperasaun ekonómika, Ministru informa ona ba membru sira Parlamentu Nasionál nian katak “planu ne’e kombina medida 71 iha tempu badak no tempu médiu, atu implementa husi Governu Konstitusionál VIII to’o tinan 2023”, “foka liu ba agrikultura, turizmu, abitasaun, edukasaun, saúde, protesaun sosiál no reforma institusionál”, iha “faze dahuluk, ho objetivu atu hamenus impaktu KOVID-19, liuhusi resposta tempu badak”, foka liu ba “atu evita lakon serbisu, apoia família sira no impede taka empreza sira – haree liuliu kona-ba manutensaun nivel sira husi konsumu no padraun moris nian” no iha “faze daruak, ho medida sira prazu médiu, destinada ba rekuperasaun ekonómika (abranje períodu ida tinan 2 to’o tinan 3)”, hodi buka “ atu hatán ba dezafiu sira ne’ebé kauza husi pandemia, maibé mós ba frakeza estruturál sira”.

Fidelis Magalhães afirma katak prioridade polítika Governu nian, ba tempu naruk “sei alarga tan objetivu ekonómiku sira ne’ebé boot liu iha Programa Governu Konstitusionál VIII, ho finalidade atu loke dalan ida ba kreximentu sustentavel ne’ebé forte liu no dezenvolvimentu ida ne’ebé ekuitativu”, ho polítika ida makroekonómika Governu nian, “ ne’ebé mak favoravel liu iha dezenvolvimentu setór produtivu sira (agrikultura, turizmu, mina-rai no minerál no manufatura), promove investimentu setór privadu nian no ba reforsu iha ita-nia sustentabilidade fiskál no ba indústria finanseira”. "Polítika sira ne’e sei reforsa no uza hodi garante implementasaun ba asaun no estratéjia nian sira ba kreximentu ida sustentavel no dezenvolvimentu ida ne’ebé ekuitativu iha país nia laran".