Governu Timor-Leste

Governu, liuhusi Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo no Vise-Ministra Finansas, Sara Lobo Brites, ohin, loron 15 fulan-outubru tinan 2020, entrega ona Proposta Lei Orsamentu Jerál Estadu (OJE) tinan 2021 nian ba Prezidente Parlamentu Nasionál, Aniceto Guterres.

OJE tinan 2021 ne’e iha ninia prioridade sira hanesan dezenvolvimentu kapitál sosiál, dezenvolvimentu ekonómiku, ne’ebé aliña ho medida sira ne’ebé inklui ona iha Planu Rekuperasaun Ekonómika, dezenvolvimentu infraestrutura bázika fundamentál nian sira, dezenvolvimentu ambientál no dezenvolvimentu institusionál no husi prosesu sira kona-ba reforma institusionál sira ne’ebé la’o hela.

Orsamentu Jerál Estadu tinan 2021 nian ne’e aprezenta reseita no despeza hotu-hotu husi órgaun no servisu sira Setór Administrativu nian ba tinan finanseiru 2021, ho montante globál husi despeza konsolida ho valór hamutuk dolar amerikanu millaun $2.029,5. OJE ne’e kompostu husi Orsamentu Administrasaun Sentrál, Orsamentu Rejiaun Administrativa Espesiál Oekusi Ambenu no Orsamentu Seguransa Sosiál nian.

“Despeza sira husi órgaun no servisu Administrasaun Sentrál nian sa’e ba dolar amerikanu millaun $1.797,2”, no ninia “dotasaun sira fahe hanesan tuirmai ne’e, tuir klasifikasaun ekonómika: dolar amerikanu millaun $228,2 ba Salárius no Vensimentus; dolar amerikanu millaun $397,3 ba Beins no Servisus; dolar amerikanu millaun $694,9 ba Transferénsias Públikas; dolar amerikanu millaun $58.8 ba  Kapitál Menór; dolar amerikanu millaun $417.7 ba Kapitál Dezenvolvimentu nian”.

 “Despeza [Seguransa Sosiál nian] ho valór dolar amerikanu millaun $177,3” no “despeza Rejiaun Administrativa Espesiál Oekusi Ambenu (RAEOA) nian sa’e ba dolar amerikanu millaun $127,0”. “Dotasaun sira ba despeza [RAEOA] nian fahe hanesan tuirmai ne’e, tuir klasifikasaun ekonómika: dolar amerikanu millaun $11,1 ba Salárius no Vensimentus; dolar amerikanu millaun $23,8 ba Beins no Servisus; dolar amerikanu millaun $4,3 ba Transferénsias Públikas; dolar amerikanu millaun $2.4 ba  Kapitál Menór; dolar amerikanu millaun $85,5 ba Kapitál Dezenvolvimentu nian”.

 “Orsamentu Jerál Estadu tinan 2021 ne’e aprezenta alterasaun metodolójika lubun ida-ne’ebé hakarak hakbesik orsamentu ne’e husi prátika orsamentál internasionál sira ne’ebé di’ak liu, hodi hadi’a kualidade konsetuál Orsamentu Jerál Estadu nian, hodi armoniza aprezentasaun informasaun no hodi aumenta ninia transparénsia”.

“Proposta Lei ne’e ba oin sei aprezenta “tabela foun ida ho reseita no despeza sira husi Setór Públiku Administrativu hotu, hodi nune’e osan públiku sira hotu ne’ebé hakerek ona iha Orsamentu Jerál Estadu nian bele sai klaru liután”.

“Despeza sira Orsamentál Jerál Estadu ne’e ba oin sei aprezenta no espesifika tuir programa sira, aleinde métodu klasifikasaun orgánika no ekonómika ne’ebé utiliza ona. Forma aprezentasaun foun ida-ne’e permite atu transmite tan informasaun ba Parlamentu, liuliu kona-ba objetivu husi dotasaun orsamentál nian sira, hamutuk ho informasaun kona-ba autór despeza (klasifikasaun orgánika) no tipu despeza (klasifikasaun ekonómika) nian”.