Governu Timor-Leste

Alexandra Trzeciak-Duval reprezentante husi Organizasaun ba Kooperasaun no Dezenvolvimentu Ekonómiku (OCDE) entidade ida ne’ebé sai nu’udar responsável ba Diálogu Internasionál Díli nian, sente orgullu tebe-tebes iha sorumutu ne’e, tanba forma ne’ebé mak hala’o servisu sira ne’e.

Koordenadora husi OCDE ba Polítika Dezenvolvimentu no Kooperasaun fiar katak, akordu, ne’ebé hetan aprovasaun ho aklamasaun iha sábadu liu ba, hanesan instrumentu ida ne’ebé presiza ba Estadu Frájil sira hodi lori ba simeira Nasoen Unidas nian, kona-ba Objetivu Dezenvolvimentu ba Miléniu (MDGs) no fórun internasionál sira seluk.

Alexandra Trzeciak-Duval klasifika Deklarasaun Díli nian hanesan akordu “istóriku” ida ne’ebé país frájil sira bele hato’o sira nia preokupasaun iha tempu reál nune’e mós nia hato’o nia esperansa katak, bein-estár ekonómiku ba populasaun husi Estadu Frájil sira ne’e nian bele hetan benefísiu husi fahe esperiénsia durante loron rua nia laran.

Reprezentante OCDE nian dehan katak nia kompreende preokupasaun balu ne’ebé hato’o husi Estadu Frájil sira, liu-liu kona-ba krítika husi Estadu balu ne’ebé hola parte iha sorumutu ne’e relasiona ho la iha impaktu iha investimentu no apoiu fó husi parseiru dezenvolvimentu sira.

Alexandra Trzeciak-Duval, husi sorin seluk, elojia forma ne’ebé Governu Timor-Leste nian preokupa atu promove diálogu ida produtivu tebe-tebes no hetan rezultadu diak iha Sentru ida ba Konferénsia sira ne’ebé konsidera nu’udar “estraordináriu”.