Aniversáriu Unidade Espesiál Policia ba Da-11
DILI, 14 Agostu 2020 (SRP) - Vise-Ministru Interior Antonio Armindo prezidi serímonia komemorasaun aniversáriu Unidade Espesiál Polísia (UEP) ba dala 11, ne’ebé hala’o iha instalasaun Kuartel Unidade Espesiál Polísia Bairo Pite.
Subordinadu ho lema “Não somos perfeito, mas sim somos treinados, para exercer as nossas funções” serímonia ne’e halo ho revista ba parada iha formatura, transfere kondekorasaun liuhusi promosaun deviza ba ajente sira no entrega sertifikadu de louvor ba membru UEP ne’ebé durante tinan barak hatudu sira-nia dedikasaun presta sira-nia servisu ho disiplina no profisionál.
Serímonia ne’e, asiste mós husi Prezidente Komisaun B Parlamentu Nasionál, José Agostinho Sequeira “Somotxo”, Komandante Jerál PNTL, Komisariu Faustino da Costa, Diretór Jerál Servisu Migrasaun, Superintendente Xefi Polísia Agostinho Gomes da Silva, Eis Komandante Jerál PNTL Paulo de Fatima Martins, parseria dezenvolvimentu sira husi TAF (The Asia Foundation) no TLPDP (Timor-Leste Program Development Police) nomos entidades sivil sira.
“Ohin ita halibur iha ne’e, hodi selebra UEP-nia ezistensia hanesan Unidade Élite Espesiál iha instituisaun PNTL ba dala 11. Ho natureza militár no karater Espesiál ita boot sira tenke halo formasaun no treinamentu bebeik, hodi hasae efikásia téknika. Maibé ha'u tenke rekuñese katak, kapasidade eziji mós investimentu. Tanba ne’e mesmu ha'u foin kompleta fulan 2 hanesan membru Guvernu, ha'u sei esforsu tau atensaun ba dezenvolve UEP hodi forma ema sai profisionál, disiplina no hatudu nia kapasidade hodi respeitu ba komunidade”, dehan Vise-Ministru Interior Antonio Armindo iha nia intervensaun perante parada, sesta feira ne’e.
Iha biban-ne’e, Vise-Ministru Interior Antonio Armindo kongratula mós ba membru UEP tomak ba empeñamentu, dedikasaun, firme no brani durante halo sira-nia misaun.
