Vise-Ministra Finansas participa na segunda sessão da 53.ª Reunião Anual do Conselho de Governadores do Banco Asiático de Desenvolvimento
Vise-Ministra Finansas, Sara Lobo Brites, nu’udar Governadora, partisipa iha sesaun daruak husi Reuniaun Anuál Konsellu Governadór sira nian husi Banku Aziátiku ba Dezenvolvimentu ba dala-53 (ADB, sigla ho lian-inglés), nu’udar reprezentante Repúblika Demokrátika Timor-Leste nian iha tuku 15:00 OTL (oras 14 Manila nian), iha loron 18 fulan-setembru tinan 2020. Sara Lobo Brites partisipa iha reuniaun refere, liuhusi vídeo konferénsia iha Torre Ministériu Finansas nia fatin iha Aitarak-Laran.
Sesaun daruak husi Reuniaun Anuál ba dala-53 Konsellu Governadór sira nian ne’e loloos iha planu atu hala’o iha Incheon, Repúblika Koreia nian, maibé, tanba restrisaun balun kona-ba viajen sira ne’ebé impoin husi pandemia mundiál COVID-19 nian, reuniaun ne’e hala’o iha Manila, Filipinas, ho parte barak husi Governadór sira mak partisipa iha distánsia, ho rekursu ba vídeo konferénsia.
Durante reuniaun ne’e sira analiza ona Relatóriu Anuál ba tinan 2019, Orsamentu ba tinan 2020, Situasaun Rekursus Finanseirus husi Banku Aziátiku ba Dezenvolvimentu. Sira aprova mós Kompozisaun ba Komité Prosedimentus nian ba tinan 2020-2021 no aprova mós Prezidente no Vise-Prezidente ba Asembleia Governadór sira ba períodu 2020-2021.
Reuniaun Anuál ba dala-53, ne’ebé hola parte mós Governadór sira no ninia reprezentante sira husi nasaun sira 68 nian, ne’ebé lidera husi atuál Prezidente Banku Aziátiku ba Dezenvolvimentu nian, Masatsugu Asakawa , no prezide husi Hong Nam-Ki, Ministru Finansas no Governadór husi Repúblika Koreia.
Parseria entre Timor-Leste no Banku Aziátiku ba Dezenvolvimentu, harii iha tinan 1999, bainhira foin hahú prosesu konstrusaun nasaun nian no foku husi parseria ne’e mak dezenvolvimentu infraestrutura sira nian, ligasaun entre transporte sira no investimentu iha kadeia valór nia sira ba agrikultura, hodi loke dalan ba ekonomia ida diversifikada liu no sustentavel.
Relasaun atuál entre ADB ho Timor-Leste mak define ona iha Estratéjia ba Parseria Nasionál tinan 2016-2020, ne’ebé aliña ho Planu Estratéjiku ba Dezenvolvimentu 2011-2030.
Governadora husi Timor-Leste, Sara Lobo Brites, afirma katak “Governu fó valór ba parseria entre Timor-Leste no Banku Aziátiku ba Dezenvolvimentu” no hein katak “kooperasaun boot ida iha futuru ne’ebé bele lori vantajen beibeik ba benefísiu Povu Timor-Leste nian”.
