Somutuk interministerial dahuluk kona-ba dezenvolvimentu sistema identifikadór úniku
Sorumutuk interministeriál dahuluk kona-ba dezenvolvimentu sistema identifikadór úniku hala’o iha loron 8 fulan-setembru tinan 2020, iha sala reuniaun TradeInvest Timor-Leste nian, hodi analiza atividade sira ne’ebé hala’o ona no pasu sira tuirmai ne’ebé sei realiza iha ámbitu projetu ida-ne’e nian.
Iha loron 19 fulan-marsu tinan 2020, liuhusi Rezolusaun Governu nian n.9/2020, kria ona Komisaun Téknika Eventuál ba Preparasaun Estratéjia Integrada ida ho Objetivu atu Implementa Sistema Indentifikadór Úniku ida ba Sidadaun Timoroan sira. Komisaun ne’e sei prezide husi Diretór Ezekutivu Ajénsia Teknolojia Informasaun no Komunikasaun, I. P. (TIC TIMOR) no kompostu husi reprezentante sira husi Prezidénsia Konsellu Ministrus, Ministériu Justisa, Ministériu Finansas, Ministériu Solidariedade Sosiál no Inkluzaun, Ministériu Edukasaun, Juventude no Desportu, Ministériu Saúde, Ministériu Administrasaun Estatál, Ministériu Interiór no Komisaun Funsaun Públika.
Sistema identifikadór úniku ne’e sai hanesan baze importante ida atu hadi’a prestasaun efetiva, efisiénsia no planeamentu servisu públiku sira-nian no hodi asegura jestaun no koordenasaun ne’ebé di’ak liu kona-ba polítika sosiál, no iha tempu hanesan sei permite kontribui ba konstrusaun estruturada ba governasaun eletrónika iha Timor-Leste.
Sorumutuk ne’e konta ho intervensaun maklokek nian husi Ministru Prezidénsia Konsellu Ministrus, Fidelis Manuel Leite Magalhães, ho aprezentasaun husi Diretór Ezekutivu TIK Timor nian, Roberto Caetano de Sousa Vicente, kona-ba progresu sira ne’ebé Komisaun Téknika Eventuál ne’e alkansa ona no ho aprezentasaun husi jestora projetu ne’e nian, Elizabeth Baptista, kona-ba ezbosu husi planu estratéjiku ba materializasaun sistema identifikadór úniku ne’e.
Pandemia KOVID-19 kauza limitasaun boot ba Komisaun ne’e, ne’ebé foin bele hahú serbisu iha fulan-juñu, tanba ne’e provoka atrazu iha preparasaun estratéjia integrada projetu ne’e nian. Husi kedas fulan-jullu, membru sira husi Komisaun Téknika Eventuál ne’e hahú ona halo análize kona-ba opsaun oin-oin ne’ebé disponivel ba projetu ne’e no komesa ona elabora planu estratéjiku, planu implementasaun nian no ninia orsamentu, ne’ebé sei submete ba deliberasaun Konsellu Ministrus nian.
Sorumutuk ne’e prezide husi Ministru Prezidénsia Konsellu Ministrus, Fidélis Leite Magalhães, no konta ho partisipasaun husi Ministru Finansas, Fernando Hanjam, Ministru Justisa, Manuel Cárceres da Costa, Vise-Ministru Edukasaun, Juventude no Desportu, António Guterres, Vice-Ministra Solidariedade Sosiál, Signi Chandrawati Verdial, Vice-Ministru Interiór, António Armindo, Diretór Ezekutivu TIC Timor, Roberto Caetano De Sousa Vicente, jestora projetu, Elizabeth Baptista no husi membru sira husi Komisaun Téknika Eventuál.
