Governu Timor-Leste

Prezidente Repúblika, Francisco Guterres Lú Olo, hafoin simu tiha pedidu husi Governu, dekreta ona, ohin, loron 3 fulan-setembru tinan 2020, renovasaun ba estadu emerjénsia, ba loron 30 tan, husi tuku 00:00 loron 5 fulan-setembru to’o tuku 23:59 loron 4 fulan-outubru.

Haree ba evolusaun preokupante husi situasaun epidemiolójika no proliferasaun kazu kontájiu COVID-19 nian ne’ebé rejista ona, tantu iha nivel rejionál, no mós nivel mundiál, no ho hanoin atu evita no neutraliza risku sira husi propagasaun SARS-CoV-2 nian, nune’e bele proteje saúde públika no kapasidade resposta nian husi Sistema Nasionál Saúde, Governu delibera ona iha sorumutuk Konsellu Ministrus nian iha loron 26 fulan-agostu tinan 2020, hodi propoin ba Prezidente Repúblika atu fó-sai Deklarasaun Estadu Emerjénsia.

Hafoin paresér pozitivu sira husi Konsellu Estadu no Konsellu Superiór Defeza no Seguransa, Parlamentu Nasionál autoriza ona Prezidente Repúblika deklara renovasaun estadu emerjénsia ba dala lima, husikedas momentu pandemia COVID-19 ne’e mosu, ne’ebé konsidera tenke halo duni haree ba evolusaun husi situasaun iha mundu no liuliu iha nasaun viziñu sira.

Iha ninia intervensaun iha debate Parlamentu Nasionál, kona-ba pedidu autorizasaun ba renovasaun estadu emerjénsia, Primeiru-Ministru temi klaru kona-ba númeru ne’ebé aas husi “ema ne’ebé infetadu ona iha nasaun no territóriu 206”, “besik ona rihun 26”, ne’ebé “ halo ema rihun 800 resin mate ona”. Xefe Governu ne’e destaka mós situasaun iha rejiaun ne’e, liuliu “iha país viziñu, iha ne’ebé númeru kazu nian aumenta maka’as no reprezenta perigu importasaun no kontájiu nian ba ita-nia país”, tanba ne’e “ita tenke rekorre ba estadu emerjénsia, hodi limite direitu no liberdade ba ita-nia populasaun, atu nune’e bele halo kontrolu maka’as liután no identifika kazu sira, liuliu iha ita-nia fronteira sira, nune’e mós haforsa medida sanitária no kuarentena obrigatóriu, hodi trata sira-ne’ebé hetan ona kontájiu no atu evita hada’et iha husi ema ba ema iha ita-nia populasaun nia leet”.

Primeiru-Ministru hateten tan katak “esforsu hirak ne’e hotu ninia objetivu mak atu deteta kazu importadu sira no kura kazu sira-ne’e, hodi evita kazu tranzmisaun iha komunidade nia leet no salva moris”.

Governu atu aprova daudaun ona medida sira ba ezekusaun deklarasaun estadu emerjénsia nian.