Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, hato’o parabéns ba Ajénsia Teknologia da Informasaun no Komunisaun (TIC TIMOR I.P) ba aniversáriu datoluk institutu ne’e nian.

“Ha’u hakarak fó parabéns ba TIC TIMOR I.P, ba Diretór Ezekutivu no ekipa tomak. Dezeja atu TIC TIMOR kontinua servisu maka’as, nune’e ita-nia objetivu atu aplika Governasaun Eletrónika ne’ebé nu’udar pesa importante no save ida ba Governasaun di’ak, la’ós de’it ba prestasaun konta maibé lori servisu ne’ebé di’ak ho lalais ba to’o iha ita-nia sidadaun sira, tenke hadi’a di’ak liután ba tinan barak ne’ebé sei mai ba dezenvolvimentu ida-ne’ebé diak liu no inkluzivu ba sidadaun Timor-Leste tomak,” ministru PKM espera.

Portavós Governu nian ne’e apresia ho serbisu ne’ebé TIC TIMOR halo ona durante tinan tolu nia laran, iha ne’ebé liña ministeriál no munisípiu sira halo servisu online ho lalais no di’ak liu, no hein katak ba mai TIC TIMOR sei halo serbisu di’ak liután maske hasoru dezafiu barak.

Aleinde servisu ho liña ministerial ba preparasaun website, organizasaun interna, informatizasaun ba dijitalizasaun no asesu  informasaun bele to’o munisípiu, ba daudaun ne’e TIC TIMOR mós serbisu maka’as hela iha área infraestrutura telekomunikasaun ba desentralizasaun governu nian.

Relasiona ho promulgasaun husi Prezidente, foin lalais ne’e, ba lei prevensaun no luta kontra korrupsaun, papél TIC TIMOR nian importante tebe-tebes tanba “ita-nia administrasaun públika sei la presta servisu diak liu ba ita-nia sidadaun sein ita iha kapasidade ne’ebé forte iha área teknolojia no informasaun,” Ministru ne’e salienta.

Ikus liu, na’i-ulun ne’e apela ba ekipa TIC Timor nian tomak atu, maske hanesan organizm foun ida no ho funsionáriu sira mós maioria joven, kontinua servisu ho laran la’ós de’it ho objetivu atu presta servisu diak ba estadu maibé kontinua ho vontade ne’ebé forte atu kapasita sira-nia an tanba futuru aban bainrua ne’e sei depende ba kompetisaun, liu-liu iha área ne’ebé mak TIC TIMOR serbisu ba.

TIC TIMOR I.P kria ho dekretu lei n. 29/ loron 29 fulan-agostu tinan 2017 no iha tinan tolu nia laran, dezde ninia kriasaun, halo ona avansu lubuk ida, no agora konsege prienxe ona rekizitu em termos kuadru no kapasidade téknika ne’ebé presiza nu’udar I.P ida. Maske nune’e, daudaun ne’e, organizmu ne’e sei tutela hela iha Gabinete Primeiru-Ministru no tanba fiskál úniku seidauk iha.