Vise-Ministra Finansas partisipa iha debate kona-ba Sustentabilidade Ekonómika ne’ebé IDN promove
Vise-Ministra Finansas, Sara Lobo Brites, partisipa iha Debate Boot Institutu Defeza Nasionál (IDN) nian, kona-ba tema “Sustentabilidade Ekonómika iha Timor-Leste”, iha loron 25 fulan-agostu tinan 2020, iha Palásiu Nobre, iha Lahane, iha ámbitu komemorasaun aniversáriu ba dala 10 IDN nian.
Debate Boot IDN nian ne’e hala’o iha loron 25 no 26 fulan-agostu, no aleinde tema Sustentabilidade Ekonómika, diskute mós tema sira hanesan “Seguransa no Defeza Nasionál”, “Dezafiu Estratéjiku sira husi Impaktu COVID-19” no “Polítika Nasionál Edukasaun” nian.
Sara Lobo Brites, ne’ebé hala’o knaar hanesan Vise-Ministra Finansas Interina durante tinan rua, ko’alia kona-ba kestaun espesífika rua: “razaun sira atu estabelese polítika sustentabilidade ekonómika ida ba Timor-Leste” no “meiu hirak ne’ebé nesesáriu atu atinje sustentabilidade ekonómika”.
Governante ne’e afirma katak “hafoin dékada dahuluk independénsia nian, país ne’e hahú ona prosesu dezenvolvimentu sosiál no ekonómika sustentavel ida, ne’ebé hatuur iha Planu Estratéjiku Dezenvolvimentu tinan 2011-2030 nian, ho objetivu atu transforma Timor-Leste sai nu’udar nasaun ‘prósperu no forte ida ho rendimentu médiu-aas”. Nune’e “reforma hirak ne’ebé hala’o daudaun no prioridade atuál Governu nian aliña ho Planu Estratéjiku Dezenvolvimentu tinan 2011-2030 nian hodi atinje di’ak liután objetivu ida-ne’e”.
Vise-Ministra ne’e hateten mós katak “sustentabilidade fiskál ne’e nudár dezafiu boot ida-ne’ebé país hasoru iha momentu ida-ne’e”. Iha kontestu ida-ne’e, Vise-Ministra hatutan katak “tanba finansiamentu ba Orsamentu Jerál Estadu nian, parte boot liu maka maihusi reseita sira hui Fundu Mina-rai nian, mak reforma oin-oin hala’o daudaun ho objetivu atu aumenta reseita doméstika sira, nune’e bele hamenus dependénsia ba Fundu Mina-rai nian”.
Vise-Ministra ne’e mós dehan tan katak “ekonomia Timor-Leste nian karakteriza ho dependénsia ne’ebé maka’as tebes husi despeza públika sira, prevalénsia setór naun-formál nian no nivel investimentu ki’ik iha setór privadu, “tanba ne’e, presiza diversifika ekonomia, inklui setór hirak ne’ebé iha potensiál boot liu hanesan turizmu, indústria no agrikultura. Ba ida-ne’e, “tenke kria ambiente ida-ne’ebé favoravel ba investimentu husi setór privadu no asegura sustentabilidade fiskál, iha ne’ebé inklui kontrolu no efisiénsia iha gastu públiku sira”.
Vise-Ministra ne’e defende nivel porsentu tolu husi Rendimentu Sustentavel Estimadu atu finansia Orsamentu Jerál Estadu nian tuir saida maka Lei Fundu Mina-rai nian hateten ona, ne’ebé prevee atu jere didi’ak fundu mina-rai nian hodi fó benefísiu ba jerasaun atuál no jerasaun sira tuirmai.
Ikusliu, Vise-Ministra Finansas afirma katak “Governu ne’e komprometidu atu asegura no garante sustentabilidade ekonómika nasaun nian iha futuru, no ba ida-ne’e, presiza apoiu husi kamada hotu-hotu husi sosiedade timoroan atu atinje objetivu ida-ne’e”.
