Ministra Saúde no Vise-Ministru Interiór observa diretamente fatin kuarentena nian iha Mota-Ain
Ministra Saúde, Odete Maria Freitas Belo, no Vise-Ministru Interiór, António Armindo, hala’o vizita ida, iha loron 5 fulan-agostu tinan 2020, ba postu integradu Mota-ain, iha Batugadé, hodi observa diretamente kondisaun sira husi fatin kuarantena ba sidadaun sira ne’ebé tama mai territóriu nasionál.
Vizita ne’e ninia objetivu mak atu analiza saida de’it maka presiza iha instalasaun kuarentena nian iha postu fronteira Mota-Ain.
Ministra Saúde, iha vizita ne’e, ko’alia kona-ba “nesesidade atu halo koordenasaun ho parte lojístika, hodi hadi’a infraestrutura sira, liuliu fasilidade sanitária, atubele simu ema barak liután”.
Odete Maria Freitas Belo hatete “hein katak atividade hadi’a fatin ida-ne’e bele hahú ona iha semana oin, liuliu kona-ba lojístika”, “hodi hatán ba problema limitasaun espasu ne’ebé daudaun ne’e iha” ne’ebé obriga “bainhira ema barak maka tama mai iha postu entrada, sira balu tenke lori ba fatin kuarentena nian iha Dili”.
Iha fatin hanesan, Vise-Ministru Interiór, deklara katak, sei mantein koordenasaun no monitorizasaun permanente kona-ba serbisu hamutuk ho Ministériu Saúde, iha Pontu Entrada nian hotu-hotu.
“Ita serbisu nafatin ho Ministériu Saúde hodi akompaña evolusaun husi situasaun ne’e, atu nune’e ita bele garante prevensaun COVID-19 ho dalan ne’ebé di’ak liután. Ministériu Interiór liuhusi Diresaun Jerál Servisu Migrasaun no PNTL (Polisia Nasionál Timor-Leste), Unidade Patrullamentu Fronteira, sei serbisu hamutuk nafatin ho ekipa vijilánsia husi Ministériu Saúde, hodi kontinua halo monitorizasaun, liuhusi triajen no rastreiu iha pontu Entrada hotu (aeroportu, portu no fronteira rai-maran sira)”, Vise-Ministru ne’e esplika.
Aleinde ne’e, Vise-Ministru Interiór husu ba populasaun hotu-hotu atu hakmatek nafatin no labele hakfodak, tanba Governu sei halo esforsu hotu-hotu hodi kontinua halo prevensaun no kontrolu COVID-19 nian iha Timor-Leste.
