Vise-Ministru Interior vizita Postus Unidade Patrullamentu Fronteira no Komandu PNTL iha RAEOA
Vise-Ministru Interiór (VMI), António Armindo, akompaña husi Sekretáriu Estadu Protesaun Sivíl (SEPS), no husi ekipa tékniku husi Gabinete Primeiru-Ministru no mós tékniku aprovizionamentu nian husi Ministériu Interiór, hala’o vizita ida, iha loron 8 no loron 9 fulan agostu tinan 2020, ba Postu Seguransa Unidade Patrullamentu Fronteira (UPF) nian, iha Kibiselo no Oesilu, ba Komandu PNTL (Polisia Nasionál Timor-Leste) nian no ba Kompañia Charlie UPF nian, iha Rejiaun Administrativa Espesiál Oekusi Ambenu (RAEOA).
Ho vizita ba RAEOA ida-ne’e, Vise-Ministru remata ona vizita hale’u postu UPF hotu iha País ne’e, atu haree diretamente kondisaun instalasaun no dezafiu sira ne’ebé membru UPF sira hasoru.
Iha loron dahuluk, durante vizita ba postu Kibiselo, Vise-Ministru hatete katak “hafoin vizita postu UPF sira hotu, lori Governu nia naran, ha’u hakarak felisita ba membru UPF hotu, ne’ebé, maske hasoru difikuldade, no ho rekursu ne’ebé limitadu, hatudu nafatin espíritu nasionalizmu, hodi kumpre imi-nia misaun atu asegura fronteira”.
Governante ne’e temi kona-ba “serbisu maka’as ne’ebé UPF no ita-nia foras defeza nian, F-FDTL, halo, ne’ebé iha espíritu boot atu halo populasaun sira iha fronteira moris hakmatek. Ha’u agradese mós ba komunidade sira ba sira-nia ajuda halo barraka emerjénsia ida-ne’e sai posto seguransa UPF Kibiselo nian”.
António Armindo hatete katak “prioridade dahuluk maka harii postu UPF hotu-hotu ho modelu ida de’it, kompletu ho fasilidade, ho nesesidade bázika, asesu ba dalan no eletrisidade”, no destaka nesesidade “atu halo liña koordenasaun ida ho Ministériu no Instituisaun relevante sira hanesan Obras Públikas, Diresaun Terras no Propriedades no mos Ajénsia Dezenvolvimentu Nasionál (ADN), hodi finaliza planu hirak-ne’e”. Governante ne’e hatutan katak tuir planu Governu nian, iha futuru, sei aumenta tan membru efetivu UPF nian, liu-liu ba kompañia husi ALFA, BRAVO CHARLIE.
Iha okaziaun ne’e, Vise-Ministru mós halo inaugurasaun ba gruta St. António, ne’ebé harii bazeia ba inisiativa husi membru UPF no komunidade Kibiselo nian.
Iha loron 8 fulan-agostu ne’e, Vise-Ministru Interiór vizita mós Kompañia Charlie UPF nian iha RAEOA, no Komandante Kompañia ne’e nian, Inspetór-Xefe Jaimito Hei, halo aprezentasaun ida hodi esplika situasaun jerál iha RAEOA.
Tuirmai, Vise-Ministru ho nia ekipa, ho akompañamentu husi Komandante Polísia RAEOA, Superintendente Xefe, Mateus Assunção Mendes, hasoru malu ho Vise-Prezidente Autoridade, Maximiano Neno, no ho Sekretáriu Rejionál sira, iha rezidénsia administrasaun RAEOA nian, iha Oebau Suku Costa, no mós Postu integradu Sakato, iha Suku Nipani, hodi haree besik kondisaun servisu ekipa sira husi vijilánsia Saúde, kuarentena, Alfandega no UPF.
Iha loron 9, durante vizita ba Komandu PNTL RAEOA nian, António Armindo fó “parabéns ba estrutura tomak ba prestasaun servisu ne’ebé di’ak tebes iha sira-nia serbisu durante estadu emerjénsia ida uluk no daudaun ne’e, ita avansa estadu emerjénsia ba períodu dahaat.
Vise-Ministru Interiór hatete katak “ami mai to’o iha ne’e atu identifika problema sira kona-ba infraestrutura sira ba dezenvolvimentu PNTL nian, nune’e mós preokupasaun sira komunidade no Komandu-Jerál husi forsa polisiál ida-ne’e nian. Ita espera katak ba iha futuru, PNTL bele sai polísia ne’ebé kredivel no hetan nafatin konfiansa husi povu”.
Iha fatin hanesan, Komandante Polísia RAEOA, Superintendente Xefe, Mateus Assunção Mendes, halo aprezentasaun ida ba Vise-Ministru kona-ba servisu Polísia ninian, no nia afirma katak, durante períodu ida-ne’e, nia ho estrutura tomak kontinua monitoriza no akompaña nafatin akontesimentu iha RAEOA, hodi garante katak situasaun KOVID-19 ne’e sei la afeita ba estabilidade, seguransa no pás iha país ne’e.
Iha vizita ida-ne’e, Vise-Ministru Interiór ho ninia komitiva, ho akompañamentu husi Komandante Polísia RAEOA nian, Vise-Prezidente Autoridade, Maximiano Neno, no Sekretáriu Rejionál sira, halo mós vizita ba postu seguransa sira UPF, UPM, BOP no mós Aeroportu Internasionál “Rota do Sândalo”, iha Pante Makasar, Oekusi Ambenu, hodi haree infraestrutura prinsipál ida-ne’e iha konseitu dezenvolvimentu Zona Espesiál Ekonomia Sosiál Merkadu (ZEESM) nian.
